الجريمة التي سيحاسبنا عليها التاريخ في شم النسيم!

إحنا سلقنا البيض فى الكركديه، وعملنا ملوخية على الـEaster Bunny، يا ترى عملنا إيه في شم النسيم؟



انهارده شم النسيم وزي ما انتوا عارفين أو شامين إحنا بنغير ريحة الهوا كله لريحة استغفر الله العظيم سمك مملح (معفن)، تقريباً الفراعنة كانوا لسا بيتعلموا التحنيط فجربوا في السمك الأول وخرجوا بالاكتشاف ده بالصدفة.

إنت كمصري لازم تقيم الليل وتستغفر كدا على الجريمة اللي بنعملها في عيد الربيع، إحنا سلقنا البيض في الكركديه، وعملنا ملوخية على الـ Easter Bunny، وقلبنا النسيم لريحة فسيخ، جرايم هيحاسبنا عليها التاريخ والله.

بس خلونا نعترف إن الفسيخ مغامرة برضه زي النط بالبراشوط كدا أو وانت بتعدي الدائري من عند البنزينة، كل الاحتمالات بتقول إنك هتموت ومع ذلك بتقوم بالمغامرة دي!!!!
بس في مغامرة تانية لازم فرد من كل عيلة يقوم بيها، ألا وهي إن لازم حد في البيت ينزل يقضي عشان البيت كله ينبسط، وعلى هذا الشخص اتباع الخطوات الآتية:

1- إسأل مجرب:
العمر مش بعزقة برضه؛ لازم تكون عارف حد بياكل من المكان ده مش أقل من 5 سنين عشان تضمن إن كل الأعراض ظهرت عليه وكله تمام.

2- الشيخ البعيد سحره واصل:
دايماً تلاقي واحد يحكي ويتحاكى عن فلان اللي في الناحية التانية من الكرة الأرضية، واللي من الناحية التانية بيحكي عن علان اللي جمبك، حاجة مش مفهومة إطلاقاً، فاحنا هناخدها من قاصرها وهندور بعيد على طول.

3- اختار المكان الشعبي:
دي بقى المغامرة كلها، انت تدخل السوق ومنه على حواري وتفضل ماشي على الريحة لحد ما توصل، لو جيت في النص ومناخيرك باظت، طلع الـGPS واكتب بس شاهين الفسخاني أو عربية ملوحة إبراهيم هيجبلك الروت على طول.

4- اهتم بريحته:
أحلى حاجة فيه ريحته، وربنا يسامحنا على الكذب ده
بس فعلاً ريحته بتفرق، هو أنا صحيح عمري ما شميت فسيخ بايظ لإن هما بيقنعونا إن هي دي ريحته وهو مش بايظ، شوف أهم حاجة النية!

5- ما تثقش في حد:
إثنين مالهمش أمان؛ الفسخاني والنسوان،
وده موسم يعني هتلاقيه بيبيعلك المضروب على إنه أفغاني ما عدش في أمان في الدنيا والله يا صاحبي.

نقلاً عن MBC مصر

أكلة الفسيخ المثالية – نقلاً عن شبكة MBC مصر.

بكدا إنت بترمي نفسك وعيلتك في التهلكة بنجاح، وكل سنة وانتوا طيبين وسالمين.