قبل ما رجلك تغرز – عمارة من غير make up!!

هذا المقال هزلي في المقام الأول وأي تشابه بينه وبين الواقع يعتبر استظراف من الكاتب ليس إلا.



“طالب حيران”

كلنا بعد إعدادي بنفكر في القسم اللي هنكمل فيه الـ”4000 سنة” اللي جايين ومن بعدهم حياتنا المهنية السعيدة، ولو انت مش شايف نفسك في قسم معين وقررت تاخد آراء بعض الناس أو الزملاء أو حتى تعمل “حادي بادي” على الأقسام ووقع اختيارك على قسم عمارة فأنت محظوظ إنك من القلائل اللي هيعرفوا حقيقة القسم ده قبل ما يدخلوه.

“أنت ما بتدخلش عمارة، العكس صحيح” – طالب عمارة عتيق

دلوقتي هنستعرض بعض “الأساطير” اللي سمعتها أو هتسمعها عن القسم ونقارنها بالواقع.

 

“الأساطير”

“قسم سهل” ، “قسم الفرافير” ، “قسم الرسم” ، “أدبي هندسة” ، “اللي إيده في الألوان مش زي اللي إيده في الخرسانة” ، “ما عندهمش شيتات” ، “عمارة قسم البنات” وحجات تانية كتير..

القصد إنه قسم سهل مفيهوش حاجة، كله رسم ولعب وجد وحب وفراغ ودنيتهم بامبي خالص.

 

“الواقع المرير”

مش عارف أجيبهالك إزاي..
مشروع ديزاين، لوح تنفيذية، هتشيل أدوات كأنك شغال ع المحطة، مش هتلاقي وقت تتلفت حواليك ولو إتلفت يبقى انت عندك تسليمة “late”، تسهيلاً للموضوع مفيش أستاذ مادة هيسيبك لمحاضرته الأسبوع الجاي فاضي كدا فهيديك بعض الـtasks “البسيطة” تشغل بيها وقت فراغك أو أسبوعك كله الحقيقة واضرب الكلام ده في عدد الأساتذة وإياك تعترض ع الوقت ده انت “كان معاك أسبوع”…

ومش بس كدا ده كمان هيكون عندك بعض “الخروجات” لأماكن “راقية” زى السبتية والعتبة والرويعي للتعامل والحوار والفصال تحت بند إحضار “عينات”، واستكمالاً لعرض “الكومبو” ممكن منطقة دراستك بمادة زي التخطيط تكون منطقة نائية بمدينة صحراوية زي الشروق وتعيش بنفسك realty show  بعنوان “عطشان في مدينة الألف شبح”.

نيجى بقى لأهم الأساطير “عمارة قسم البنات”، طيب لما القسم فيه بنات إزاي بقى بيعملوا كل ده؟!!

البنت في عمارة أو في أي مكان عندها القدرة على التكافل، هي عليها البحث المكتوب والولاد ينزلوا الموقع، أو إنها تكون كائن طفيلي أحادي الخلية خايفة تبوظ المانيكير وداخلة القسم في الأساس عشان تتعلم ترسم الآي لاينر، لكن أكيد عندنا استثناءات من الكلام ده، وفي النهاية عمارة بيكون الاختيار الأول للبنات بسبب إنهم صدقوا الخرافات والأساطير.

 

“شايف نفسي في القسم ده”

طبعاً الكلام ده بنقوله للطالب اللي مش محدد قسم وخايف يغلط في اختياره، لكن لو انت عارف بتعمل إيه وحابب القسم، فعمارة مش مجرد قسم في هندسة، عمارة هتخليك تعيش الدنيا بشكل مختلف تماماً، هتغير حياتك ونظرتك للأمور، هتغيرك أنت نفسك…

ودول كلمتين تصبر بيهم نفسك وانت بتتنفخ الأربع سنين اللي جايين وبتتفرج على حياتك وهي بتتدمر قدام عنيك.