دليلك الحصري لقضاء دورة تربية عسكرية سعيدة

أهم النصائح اللي تقدر تقضي بيهم الأسبوعين الأطول في حياتك من غير ما تكون متكدر



 

مع الإعلان عن فترة جديدة للتربية العسكرية في إجازة منتصف العام، إليك أهم النصائح اللي تقدر تقضي بيهم الأسبوعين الأطول في حياتك من غير ما تكون ” متكدر “.

أولاً علشان تبقى فاهم الدنيا، هتلاقي رتبتين عقيد و نقيب أو رائد، انت وظروفك!
هيزوروك كل يوم مرتين، مرة في أول اليوم علشان الغياب و دا أهم حاجة.
و الثانية علشان المحاضرة وبين المرتين ساعات وساعات من لا شيء حاجة بتقضيها حبيس المدرج.

نصيحة مجرب :

أولاً الغياب :

دي أهم حاجة في اليوم و افتكر دايما إنك صحيت بدري و نزلت من بيتك علشان اللحظة دي فياريت تعمل الآتى :

أفندم وبصوت واضح وعالي و أفندم يعني مش أيوا وموجود أو أي حاجة تانية، ومش هقدر أوصفلك كمية التعاسة اللي هتكون فيها لو اتاخدت غياب عشان سبب تافه زي دا.

في الفترة دي خلي بالك إنك متكونش مخالف في التعليمات سواء في الزي أوغيره.

أخرك يومين في الغياب و متغبهومش أحسن، لأنك معرض جدا أكتر مما تتخيل إنك تتغيب في أي وقت تكون حاضر فيه.

ثانياً المحاضرة :

المحاضرة بتنقسم لجزئين الأول منهج دراسي صغير أغلبه تاريخ، وفي الآخر كدا كام كلمة عن حروب الجيل الرابع و الخامس و العاشر كمان لو حابب.
و الجزء الثاني و على عكس المتوقع بيبقى فيه مناقشة (مناقشة ميري يعني يا هقنعك يا هموتك) وهتكون في الأمور السياسية و الإجتماعية أو أي حدث حصل فيه جدل.

هتسمع العجب !

من أول إن جهاز الكفتة خدعة علشان نضغط في استيراد أدوية بتعمل نفس الشيء المفروض، مروراً بإن مصر خلاص بقت قد الدنيا لحد إن الراحل الجغرافي الدكتور “جمال حمدان” قال إن تيران و صنافير سعودية ! طبعاً لو دورت وراه هتلاقي العكس تماماً، و إن الدكتور أقر فى كتابه “سيناء” إن الجزيرتين مصريتان!

ثالثا ما بين الغياب و المحاضرة :

قدامك حل من اتنين يا تنام يا تشغل وقتك في أي حاجة.
لو هتنام هات في شنطتك حاجة تساعدك على دا حتى لو مخدة صغيرة.
لو هتشغل وقتك بحاجة فالقائمة كبيرة أوي ممكن تجيب كتاب معاك أو حتى شغل عليك تنجزه.
طبعا أنا مش هقولك هات معاك مثلا لاب توب و اتفرج على فيلم أو العب عليه لأن دا ممنوع يا جماعة !

أخيراً ابعد عن المشاكل، تخيل نفسك جندي قوات خاصة وهدفك تمنع غيابك لمدة أسبوعين من إنه يضرك.
وشكراً.

نتمنى لكم دورة موفقة.