5 طرق لمذاكرة فعالة في الميدترم

ما تضيعش وقتك كله في المذاكرة



 

كل ميدترم وأنتم بصحة وبخير، في كل سنة دراسية بنبدأها بنقول هنشد حيلنا السنة دي وهنذاكر أول بأول، لغاية لما نوصل للإسبوع السابع أو الثامن وينزلوا جدول الميدترم، ونكتشف إن إحنا فعلاً في ورطة !!
بس الحمد لله بفضل الإنترنت لقينا 5 طرق سهلة ومفيدة علشان نذاكر للميدترم في أقل جهد ممكن وأكتر فائدة ممكنة.

1) 30 دقيقة أفضل من 10 ساعات

الطريقة تسمي بالـPomodoro، والهدف منها التقليل من التشتيت اللي ممكن يحصل، بحيث تاخد 30 دقيقة من وقتك مع 5 دقايق بريك، بالتالي دماغك هيشتغل بـ25 دقيقة ودي المدة كافية ليكون مخك شغال ومركز من دون أي تشتيت، و بعدها بريك لـ5 دقائق فقط لكباية نسكافيه أو سناك علشان ما تنشغلش.

2) بلوك للإنترنت

تبعاً للنصيحة الأولى، علشان تبعد عن كل التشتيت اللي بيحصل، فيه أكتر من أبلكيشن على الموبايل علشان تمنعك من إنك تفتحه بالمدة اللي أنت بتحددها، دا يساعدك انك تبطل تسأل كل صحابك إذا كانوا بيذاكروا ولا لاء وهيقلل من نسبة إحباطك و كسلك في المذاكرة.

3) كومة التنظيم 

دائماً لما بفتح المادة لأول مرة وببدأ أكتشفها مش بعرف فين بيودي على فين، فالحل هو التنظيم، أعرف من مصدر موثوق زي الدكتور أو الأول على الدفعة المادة بتتذاكر من فين ( كشكول، سلايدز، كتاب، ولا ملهاش أصل ) دا هيساعدك فعلاً انك تعرف تبدأ من فين، والأفضل انك تخلي جميع مصادرك أمامك، ولا تكتفي باللي عندك بس، استعن بصديق لإفادة أكبر.

4) يوم لكل مادة

من الأفضل انك تقسم الأيام على المواد، حيث يكون كل يوم لكل مادة، لتثبيت المعلومات و المسائل أكتر، وإن كنت من أصحاب البخت السعيد مثلي وعندك مادتين في يوم، فالأفضل تبدأ قبلها بيومين وتبدأ بالأهم فالمهم ومن الأصعب للأسهل.

5) بالألوان

نُص عقلك بيعتمد على الألوان في الفهم و الحفظ، فحاول تخلي العنواين و النقط المهمة بلون مختلف بدل ما يكون كل مذاكرتك بلون واحد، دا هيساعد انك تتذكر اللون والإجابة كمان، فلخص كل اللي بتذاكره في نقط عريضة ويا حبذا لو أتسعنت بخرائط العقل أو الـ Mind Maps.

مذاكرة موفقة، ونتمنالك تحصيل درجات من حيث لا تحتسب !