الـGoals يا منى!

يعني أنتِ كل حياتك اختزلتيها في واحد يربطلك رباط الجزمة؟!



البنات (والولاد أحياناً) -إلا من رحم ربي- بدأوا مؤخراً يعملوا تصور لعلاقتهم وحياتهم العاطفية بناءً على شوية صور أبيض وأسود وصور الـ”Sometimes forever lasts”.. بجد؟! يعني أنتِ كل حياتك اختزلتيها في واحد يربطلك رباط الجزمة؟!
أنا بشوف ناس كتير جداً سواء مرتبطين أو عايشين في الفريند زون أو غيره مقتنعين وبيقروا إن دي شكل العلاقة اللي كانوا أو مازالوا بيدوروا عليها!

أنا شايفة من وجهة نظري المتواضعة إن أنا كبنت آه مهتمة بنفسي بقدر المستطاع بس برضه في نفس الوقت -باعتبار ما سيكون- هبقى زوجة وأم وبشتغل، والمفروض حياتي تبقى واقعية عن كدة شوية… يعني مثلاً صاحية الصبح بدري ونايمة قبلها متأخر، كسلتي تشيلي المكياج من على وشك، في واحد جنبك هيصحى يلاقي واحدة شبه الباندا نايمة قصاده، يبتسملك وما يتخضش يعني، ويفضل مبهور بيكي زي أول مرة شافك فيها مهما كنتي ملخبطة حرفياً، دي أعلى حاجة في الـ “Goals”، وبكده أنتِ وصلتي للقمة خلاص.

10695179_1323576424325500_1509617027_n

خلاصة الكلام مفيش “Relationship Goals” أعظم من إن شريكك يبقى “Your best friend”، إنكم تحلوا مشاكلكم مع بعض وتبقوا متفاهمين وتتكلموا بكل صراحة حتى وانتم متخانقين، دي حاجة لا تقدر بثمن.

وآه! فككوا من الصور اللي مغرقة السوشيال ميديا عشان ما بتأكلش عيش، أنت مش هتتجوز واحدة من عيلة كارديشان، ولا انتِ هتتجوزي واحد شبه الموديل اللي بيتصور مع الكلب بتاعه ده ?