الخلاصة في ورقة

الخلاصة في ورقة، مش برشامة!



التيرم خلص! إيه السرعة دي! عدى بسرعة أوي صح!!
وكمان خلاص امتحانات الفاينل على الأبواب أهو، إذا ما كانتش دخلت علينا من غير استئذان كمان!!

قبل الامتحانات بقى والمدعكة اللي احنا داخلين عليها، لازم كنت أقول حاجة يمكن تفيدنا في الامتحانات -تقدروا تقولوا عن تجربة شخصية- ، في بعض الناس وبالرغم من إنها ذاكرت وبتذاكر من أول السنة، إلا إنها ما بتحلش كويس في الامتحان، وفي ناس بتذاكر قبل الامتحان بيوم وبتحل كويس -أحياناً يعني مع بعض الناس-، بس الفرق بين الإثنين مش فرق في تكوين الدماغ زي ما المعظم فاهم، الفرق بيكون في طريقة ترتيب المعلومة في دماغك مع الأخذ بالاعتبار فروق التفكير برضه من غير شك.

كتير برضه بيكون مذاكر المنهج كله وعارف كل حتة فيه، إلا إن ممكن بيجيله سؤال يحس فيه إنه تايه ومش عارف يطَلَّع معلوماته صح من دماغه زي ما ذاكرها، أو يحس فيه إنه متردد في الإجابة، أو المعلومة بتطلع من دماغك بالعافية، أو يجيله السؤال مش عارف يكتب فيه إيه بالظبط!

نصيحة قبل امتحان الفاينل وبعد ما هَلَّ علينا فجأه كعادته زي كل سنة، الصبح وقبل أي امتحان ما تذاكرش حاجة جديدة في المنهج!! إيه يا عم اللي إنت بتقوله ده!!
أيوة زي ما بقولك كدا، الأفضل بقى إنك تجمع وترتب أفكار المنهج كله في دماغك سواء بقى في ورقة وتسَمَّع فيها أو تكتب عناوين وتلونها، مجرد بس إنك ترتب المنهج في دماغك وتبدأ تتكلم بأسلوبك وده لو المادة فيها حفظ، أو إنك تكتب القوانين وطريقة حل كل مسألة كدا بطريقة مبسطة ودا لو المادة فيها حل وتفكير.

اللي هيحصلك بكل بساطة في الامتحان إن الورقة دي هتكون كإنها قدامك في الامتحان، قدام عينيك، تقدر تاخد منها اللي انت عايزه بتفاصيله كمان، وهتحس إن المعلومة مترتبة بشكل أفضل في دماغك، وده كله لو إنت مذاكر أصلاً، إنما لو العكس فلا يكلف الله نفساً إلا وسعها.

في النهاية أصل النجاح هو الترتيب، سواء بقى ترتيب وقتك أو مذاكرتك أو المنهج أو أفكارك أو أي حاجة عايز تعملها لازم ترتبلها في دماغك.
هات ورقة وقلم وابدأ رتب كل حاجة على أساس وقتك وقدرتك، وحاول ما يكونش ترتيبك ده تنفيذه في المشمش، زي مثلاً لما تقول هذاكر أربع مواد في اليوم، وإنت يادوبك لو ذاكرت مادة وبدأت في نص التانية تبوس إيدك وش ظهر، وربنا معانا جميعاً.