لقاء إنسايدر مع د. هيثم جمال – الجزء الثاني

كان هذا نص الجزء الثاني من حوارنا مع د. هيثم.



إستكمالًا لحديثنا مع د. هيثَم جمال، رئيس قسم التسجيل، والأستاذ بقسم

عبدالرحمن: طبعا أنا يا دكتور ماينفعش أقارن نفسي بالـ GUC  أو AUC، يبقى أقارن نفسي بحاجة من مستوايا.

د.هيثم: قارني بأى حد.

عبدالرحمن: يعني مثلًا معهد العاشر من رمضان أو الـ CIC.

د.هيثم: طيب بيدفعوا كام؟

عبدالرحمن: العاشر بيدفعوا أقل.

د.هيثم: مستحيل.

عبدالرحمن: العاشر على وقت دخولي الساعة بتاعتهم كانت أوائل الـ 300 دلوقتي أواخر الـ 300 أو أوائل الـ 400.

د.هيثم: طيب مارحتهاش ليه؟
احنا بيجيلنا ناس كتير من CIC على فكرة وزهقانين جدًا.

عبد الرحمن: بس الـ CIC فيها خدمات أكتر.

د.هيثم: لو فيها خدمات هايسيبوها ليه يعني؟ أنا بقولك تعالى أوريك وفيه ناس رفضناهم كمان.

عبدالرحمن: تمام طب بلاش الـ CIC أنا أعرف ناس حولت وبتتعلم أهو وجودة التعليم مش حلوة بس الخدمات كويسة.

د.هيثم: بص أنا مابحبش أجيب سيرة حد أنا درِّست هناك وكذا سنة، فالدنيا هناك مختلفة تمامًا، هما هناك بيعتمدوا على الإنتدابات وبيعتمدوا على الناس اللي برا الـ stuff، يعنى أنا كنت بروح يوم في الاسبوع full day، فماكانش فيه مجال للطلبة يتكلموا معايا والعدد اللي بيخدموه أقل مننا وعندهم جزء international رافعهم جامد.

عبدالرحمن: آه يعني دلوقتي الطالب بيدفع حوالي 20 ألف.

د.هيثم: لا مش عارف كام والله بس اللي أنا متأكد منه إن أي حد هنا في المكان لو لقى مكان أحسن منه في السعر هيروح لأن الـ CIC مرحبة جدًا، هى عايزة ناس فأكيد انت ماروحتش لسبب، أنا مش حابب أغلط في حد أو اتكلم عن حد بالتحديد بس أنا رُحتها كتير وليا زمايل كتير هناك وعلى فكرة رئيس القسم هناك كان زميل هنا في الأكاديمية ومن الناس اللي بدأت معانا هنا وعندنا ناس كتير بتروح إنتدابات هناك.

 عبدالرحمن: طب لو هانسيب CIC وأيًا كان مشاكلها ايه، هنروح مثلًا للشروق والعاشر استحالة حد يحول منهم ويجي هنا.

د.هيثم: العاشر بيجي الشروق لأ، الشروق فيها ميزة عن هنا انها أكاديمية لا ربحية، يعني محمد خليل خميس فاتحها ومغطي تكلفتها كلها لأن هو عنده الجامعة البريطانية هي دي اللي بتكسبه، التانية فاتحها كده بس برده ماعندهمش تكيفات في كل حتة.

عبدالرحمن: أنا رحت الشروق وبروح لناس زمايلي هناك..

د.هيثم: اه مفيهاش الإمكانيات المادية بردو وبصراحة ماحدش بيجيلنا من الشروق لكن العاشر لا، بيجيلنا كتير بس الشروق مفيهاش credit.

عبدالرحمن: لا بقى فيها السنة دي.

 د.هيثم:ماشي أنا مش باحكم على دلوقتي بس هى لغاية السنة اللي فاتت نظام فصلين، أنا الصراحة ماعنديش معلومة بس اللي أعرفه لغاية السنة اللي فاتت إنها فصلين وحالات نادرة جدًا لما بتجيلي بتبقى طلبة ساقطة نظام فصلين لكن غير كده ماعرفش، بص في عندك أكاديميتين في التعليم الخاص الأكاديمية البحرية وأكاديمية الشروق الاثنين مالهمش owner، مثلًا الأكاديمية البحرية تبع جامعة الدول العربية فالبتالي كل المكسب في الجامعة وبالتالي هما عندهم مكاسب هايلة و staff عالي جدًا جدًا، الشروق اللي أعرفه هو سايبها تغطي نفسها حتى هي أسعارها أقل مننا.

عبدالرحمن: طب هو في أكاديمية اسمها أكاديمية الإنتاج الحربي دي لسه مش بقالها كتير، اللي أنا أعرفه هناك إنها مش غالية أوي الفرق بينا وبينهم بسيط بس هما خدمات أعلى بكتير وأكيد مش الفرق البسيط.

د.هيثم: بص هو أنا معرفهمش أوي بس أى beginner لازم يعمل خدمات قوية علشان يدخل سوق الـ marketing فماقدرش أحكم عليه غير لما يستمر لكن لو اتكلمنا عن العاشر لأ،  العاشر بيحط لائحة كبيرة جدًا ومواد كتير زي لغة عربية وترجمة يعني هما بيعروفوا يكسبوا من حاجات تانية يعني ممكن أخليك تطَّلِع على اللائحة بتاعتهم موجود محاضرة إسلامية ومواد كتير جدًا يعني عندهم باين تربية رياضية وبيدفع الطالب فلوس وcredit  وعندهم summer training بفلوس بردو فلأ هما بينافسونا يعني الطلبة اللي بتيجي من هناك مش موهومين بحاجة يعني مش بيقولوا انها حاجة  wow.

عبدالرحمن: احنا بقى بالنسبة للجزء ده علشان اتكلمنا فيه حبينا نستفيض فيه، عايزين بقى نبتدي من الأول خالص نتعرف بحضرتك دكتور هيثم خريج إيه؟ واشتغل فين؟ حصل على الدكتوراة امتى؟ ومن جامعة ايه؟ وحضرتك منصبك ايه في الكلية ومن امتى؟ وكل التدرجات وهكذا.

د.هيثم: أنا من جامعة القاهرة دفعة 2000 متخرج بتقدير عام جيد جدًا  ثالث دفعتي، اتعينت باحث في جامعة القاهرة والطالب الباحث ده مش معيد هما بياخدوا الأول والثاني معيدين وبياخدوا ثالث فيما تحت طالب باحث وبيدوه كمنحة ماجستير وممكن بعد الماجستير تتعين معيد فأنا فضلت معاهم لغاية ما خلصته وموصلتش للتعين واتعينت هنا، بردو خدت الدكتوراة تبع جامعة القاهرة في النيبول الجي، اشتغلت في أكتر من مكان خاص اشتغلت في Future والـ CIC والأكاديمية البحرية ورحت طيبة بس ماطولتش وجامعة القاهرة طبعًا، وبالنسبة للأكاديمية أنا كنت ماسك مكتب تسجيل كهرباء لغاية السنة اللي قبل اللي فاتت قبل ما دكتورة منى تيجي وكان المكتب متقسم تخصصات أنا كنت ماسك تخصص كهرباء ومعايا دكتور مؤمن كان ماسك باقي المكتب وبعدين لما جت دكتور منى بقيت أنا رئيس المكتب وحصل تغيير في السيستم فأنا حاليًا ماسك قسم التسجيل في الأكاديمية، ده بجانب إني ماسك مادة في القسم.

عبدالرحمن: إحنا في محاور أساسية هنتكلم فيها بداية مثلًا من اللائحة ومين مسئول عن كتابتها؟

د.هيثم: عامة في حاجة اسمها إطار مرجعي حاجة زي Reference كده والإطار ده بيتبعت من الوزارة واحنا بنشتغل عليه فيه bases منقدرش نتخطاها منها الحاجات اللي مضايقة الطلبة زى المعدل التراكمي أقل من 2 يسجل كام ساعة واللي أعلى يسجل كام ساعة والحاجات دي موجودة في المرجع اللي هى reference لللايحة اللي قولنا عليها وبعد ما بنعمل اللايحة بناء على طلب نبعتها للجنة واللجنة دي بتعيد تقييم اللايحة وبتراجعها وبقالنا سنين في الموضوع ده لغاية اللائحة بتاعة 2019 واللائحة دي طبعا ليها قواعد والناس متفقين عليها وفي ناس بتتابعنا في الموضوع ده وجامعة القاهرة في أستاذ هناك كبير كل شوية بنروحله وبنعرض عليه اللائحة ويطلب تعديلها لغاية ما وصلنا للائحة الموجودة حاليًا ووافقوا عليها.

عبدالرحمن: والإطار المرجعي ده ثابت ولا على كل الجامعات؟

د.هيثم: لا ميز ما بين الجامعات والأكاديميات الخاصة والمعاهد ده ثابت طبعا.

عبدالرحمن: في جامعات بتبقى 1.8 والطلبة بتاخد 18 ساعة.

د.هيثم: فين زي ايه؟

عبدالرحمن: زي العاشر مثلًا.

د.هيثم: مستحيل، بتبقى مختلفة أنا مستعد أوريك كل الورق ده أصله مش سر، احنا بعتنا بده وزمايلكوا راحوا وقدموا طلب عشان الساعات الزيادة وقدموا شكوى علشان الـ GPA اللي أقل من 2 وقالوا ليه منتخرجش بأقل من 2 وقالوا لا، كل ده عملوه وقدموا شكوى واترد علينا لإن ده مش قرارنا، بص أنت لازم تكون واثق أننا جامعة خاصة وأن أنا يهمني أن أنت تكون مبسوط أنا ليه أحاربك؟! أنا وأنت مش ضد بعض، أنا وأنت مع بعض فليه هاعمل حاجة تضايقك؟! زي مثلًا قرار الفصل هل أنت متصور إن أنا عايز أفصل الطلبة؟ أكيد لا، خد بالك الطالب اللي بيتفصل ده بيسجل ويسقط ويسجل ويسقط وهو لا بيحضر ولا بيجي ولا بيكلفني معامل ولا أى حاجة يبقى ده يبسطني ولا لا؟

جالنا جواب من الوزارة السنة اللي فاتت خلاصته بطلوا نصب على الطلبة أنت شايف أن الطالب مش قادر فمتقعدش بقى تسجله، وفي نفس الوقت الطلبة فاكرة أن احنا كجامعة ضدهم وعايزين نفيد الكلية، آدي الطلبة اللي المفروض بناء على القانون يتفصلوا احنا شايفين أن دول مفيهمش أمل ودول يجي منهم ودول احنا ضامنينهم نعمل ايه؟ عارف احنا كده رمينا الكورة في ملعبهم لكن احنا مبعتناش إنذار بالفصل فأنتوا قولولنا بقى، فيروحوا هما باعتين، خلاص أنتوا أحرار، فالطلبة تروح تشتكي يقولولهم كده يجولنا تاني يقولوا لا أنت اللي عايز ترجع الطلبة ومش عارف ايه، لكن أنت لازم تبقى فاهم أن احنا قطاع خاص، ايه مصلحتي أنى أرفد طالب ؟عشان إيه يعني هو ضرني في إيه؟ طب هو في الجامعة الحكومية بياخد دعم مادي لكن أنا هنا هو بيدفعلى، أنا مثلًا يدخلي طالب في مادة 12 مرة أنت عارف 12 مرة دي يعني ايه؟ يعني ترم كامل يعني مادة بترم هل ده ملوش أماكن مثلًا؟ حتى لما احنا بعتنالهم الكلام ده قالك خلاص الناس الميتة دي ارفدوهم والناس اللي فيها أمل خلوهم بس اعملولهم خطة..

فعشان كده عملنالهم خطة فضغطنا على الطالب شوية، لأ مش لازم تحسن ولأ مش عارف ايه، كل ده غصب عننا لأن احنا جبنالك مدّ بناء على مسؤليتنا احنا، والمدّ ده معموله خطة والخطة دي الطلبة هتعرفها والموضوع ده قدامه كام ترم وهيتفصل بس احنا منفذناش الموضوع ده والكلام ده بياخد مجهود جامد.

عبدالرحمن: مفيش قرار بالفصل تم حتى الأن؟

د.هيثم: لا فيه، للناس اللي هى أنا مقدرش اتحمل مسؤليتهم، يعني في طلبة أنا بعتلهم 3 جوابات، الطلبة دي أنا ضامنهم اللي هما فوق 1.7 دول أنا ضامنهم وحاسبني عليهم لو موصلوش ل 2 ، الطلبة بقى اللي لغاية ال 1.7 عملتلهم خطة بس مبقولكش اني ضامنهم بس عملتلهم خطة على 3 ترمات أو 4 ترمات أن هما لو سمعوا كلامي على الخطة دي أقدر أوصل بيهم لبر الأمان أما بالنسبة اللي تحت ال 1 أنا شايف أن مفيش أمل خالص وبردو اللي تشوفوه احنا موافقين عليه.
فأحنا كدة نظمنا ولا منظمناش؟ رمينا الكورة في ملعبهم، صنف أنا ضامنه وصنف عامله خطة وصنف تالت أنا شايف انت بتتكلم على واحد ال جي بي ايه 0.9 على 6 ترمات و 0.6 على 6 ترمات و0.3 على 6 ترمات قولي اعمل معاه ايه؟ هو لو قالي سيبه على دماغي هسيبه بس لو عمله خطة، (اديني من سنة ولا اتنين بقى لا بتاع 5 او 4 سنين اعمل ايه طيب) لأن معظم الطلبة دي غالبا  كان مستوى 0 فاهم وداخلين مادة بال 40 ، 50 وكل اللي فصلناهم الناس اللي تحت 1 وسبنا كل اللي فوق ال1 لغاية 2 بس على مسؤليتنا بردو.

عبدالرحمن: الخطة بقى المفروض الطلبة يعرفوها امتى؟

د.هيثم: احنا وضعنا خطة أن أنت لازم تاخد مواد قديمة ولازم تجيب تقدير بس الطالب رافض، وديه مش عارفين نحلها الطالب لا عايز يسمع الكلام ولما يترفد بيزعل طب انت عايز ايه؟

طب النهارده أنا هحكيلك مثال، طالب جابلي وسايط الدنيا والآخرة والترم اللي فات كان 0.9 إديته مادتين في الترم الصيفي المفروض أن هو يموت نفسه قلتله عدي ال 1.2 وأنا هخليك موجود قام ساقط في المادتين طب بذمتك ده اعمله ايه؟ ماهو أنت بردو بتتحاسب وبتتسأل، طب أنت يعني مثلًا الناس اللي من 1 ل 1.7 هما لو سمعوا كلامي في 1 2 3 4 هعدي بيهم لبر الأمان وافق عليها دور بقى الطلبة توافق، فأول ما هناخد الموافقة رسمي الكلام ده هاينزل وهايُعْلَن للطالب، بس هو لازم يكون عارف مصيره إيه.

عبدالرحمن: يعني هى الموافقة لسه ماجاتش من الوزارة؟

د.هيثم: فيه موافقة مبدأية بس ماجاتليش، بس هما مبدئيًا موافقين وبعتولنا قالوا الناس اللي واقعة خالص دول شيلهم والباقي دول حسّنهم، هما بردو لسه بيدرسوا الخطة وخد بالك احنا بردو عملنا مشاريع مشتركة ميقدرش يقولي أنت فصلت ليه، لا أنا بعت استأذنتك وأنت وافقت فاهمني؟ لكن احنا لو متعسفين وقالي أرفد اللي تحت الـ 2 هرفدهم.

على فكرة الطلبة من 1 لـ 1.7 ( 490 ) طالب والله العظيم بيتعبونا، بص أنا مش بقولك احنا 5211 ؟ بس دول أكتر ناس تاعبيني على الكوكب وأكتر ناس بتيجي تقعد هنا وتعب ومناهدات غير طبيعي يعني لو خلصنا منهم هنرتاح.

خد بالك الطلبة الـ fresh اللي فوق ال 2 دول تسجيلهم ظريف وسهل جدًا سكاشن وأبقى مع صاحبي ومع صاحبتي وكل الكلام الخايب اللي أنت عارفه ده، اللي بيتعبني الفئة دي تقعد تحسب وبعدين تيجي تحسنله تلاقيه بيشيل كل المواد ولو شال مادة آخره C، فتلاقي الموضوع صعب ومعقد وبياخد منك مجهود جامد يعني ال 500 دول لو الأكاديمية خلصت منهم الأكاديمية هترتاح لكن الحقيقة احنا مبنفكرش في كده ومفيش حاجة اسمها في قطاع خاص بيضحي بحد الواحد ده بالنسبالي الـ product بتاعى، ماهو أنا لما أفصل كتير ده بيأثر على سمعتي وأنا يهمني إني مافصلش حد بس اعمل ايه؟ وخد بالك بردو أنت لما بتفصل فيه ناس بتمشي وهو أنا عايز الناس تمشي من عندي؟ بس أنا هاعمل إيه بردو ما في حاجات غصب عني فلازم تكونوا واثقين من كده الحاجات ديه إحنا مضغوط علينا جدًا جدًا جدًا وبنقعد نراوغ ونهرب ونراوغ ونهرب لغاية ما نوصل لحل يرضينا ويرضيهم، هما بردو على فكرة الـ top يعنى كل حاجة لازم يعتمدوها، جداول الإمتحانات لازم يعتمدوها وجداول الدراسة لازم يعتمدوها وكل حاجة فأنت متقدرش تقول لا.

عبدالرحمن: يعني هما يعتبر اللي حاكمنا.

د.هيثم: في كل حاجة.. يعني مثلًا الناس اللي أقل من 2 بيسجلوا كام ساعة؟ 14 فأحنا بعتنا لهم جواب اللي تحت ال2 ده 1.9 و 1.8 و 1.7 و 1.6 و 1.5 وكل دول زي بعض ما تيجي نعمل معادلة يعني مثلًا ال 1.9 نسجله 17 والـ 1.8 نسجله 16 وكذلك ماهو بردو مانساويش الناس ببعضها يعني إيه مثلا انا 1.999 أبقى زى الـ 1 صح كده؟ واحنا الاتنين 14 ساعة إحنا مش راضيين عن الكلام ده وقولنالهم إدونا معادلة انزل تحت ال 2 ماسجلش 18.

عبدالرحمن: واحدة واحدة.

د.هيثم: بالظبط بمعادلة ونظبط عليها.

عبدالرحمن: أوصل مثلًا لـ 1.4 وأثبت الـ 14.

د.هيثم: بالظبط كده قالولك لا ده واحد تخرج عايزين نطبقها في التيرمات العادية أنت ليه بتطبقها عليه تلاقي واحد تخرج بيجي في التيرم الصيفي فتلاقي طالب في التيرم التاني باقي له ساعة ويتخرج تعالى أوريك الجوابات اللي اترفضت من الطلبة دي كلها ونبعتله طالب طالب ونستأذنه يقولك لا طب ما تديني الموافقة أنا محتاجها هتوقف طالب على ساعة ليه؟ ما ادهاله وتعالى نحسبها ما أنا هاخد ثمنها دلوقتي وفي الصيف لكن لما ادهاله في الترم الثاني ماهو هايخلص، لا مش راضيين، طبقوا قاعدة دواعي التخرج هاتلاقوها نفس القصة وعلى فكرة زمايلكم بيشتكوا، يعني فيه ناس بتشتكي وفيه ناس واصلة وليها معارف وطلبة بتيجي تحكيلي يعني بعد ما يقعد يشد معايا وانتوا مُصرين ويروح يلف من السكك التانية فيجي يقولي الصراحة عندك حق ما أنا جربت لك ولقيت الطريق مقفول فانتوا لازم تكونوا واثقين وبالتالي أى حاجة ترضيكوا أنا أكيد هعملها ولا ايه؟ ما أنا مش فاتحها عشان في الآخر اقفلها لا عشان أكسب، ماهو أنت الـ product بتاعي أنا كل ما يجيلي طلبة أنا بكسب بس أنا عدد الطلبة اللي بيجيلي ماباتحكمش فيه، لكن اللي بيمشي من عندي مش هاتحكم فيه؟! ماهو الطالب لما يتضايق هيمشي ما هى في طلبة الفترة اللي فاتت دي مشيوا، المعاهد الخاصة مبيدققوش على أقل من 2 والكلام ده فيه ناس راحوا.

عبدالرحمن: زي Future.

د.هيثم: آه بس هى دي حاجة باسطاني بس بردو مش قادر اعملها.

عبدالرحمن: طيب هى اللايحة دي ممكن تتغير ولا نظامها ايه؟

د.هيثم: أى لايحة في الدنيا مش عندنا بس أى لايحة 5 سنين والمفروض أن أنت تغيرها.

عبدالرحمن: طب وايه الضوابط أو تتغير في النص يعني؟

د.هيثم: لا بعد ما تعتمد وقتها خمس سنين.

عبدالرحمن: يعني احنا لسه.

د.هيثم: يعني مثلًا اللايحة الجديدة النجاح فيها من 60 هل احنا عايزين كده؟

عبدالرحمن: اللي هو بقى 60% أعمال سنة.

د.هيثم: اه مش عايزينها خالص هتفرق معايا في نسب النجاح والنتايج، وأنا دكتور اهو هتعملي مشكلة وهتعملي أزمة في المواد بتاعتي بدل ما أنجح من 50 أنجح من 60 طب احنا القرار ده قعدوا يبعتولنا ونحاول فيه ونهرب منه كتير، يعني دكتور كحيل قعد 3 أو 4 سنين يهرب منه بس هما عايزين كده فده قرار احنا هنعمل بيه هيفيدني في ايه؟ لازم يكون هيفيدني، ايه اللي هيخليني أقول للطالب النجاح من 60 مش من 50 ما هو كان بينجح من 50 ونسب النجاح كانت معقولة فاهم؟ إنما 60 دي هتعملي مشكلة لكن هما مُصرين في حاجات كده مش بمزاجنا.

عبدالرحمن: طيب التغيرات بقى اللي حصلت مثلًا المصاريف اللي زادت، ليه في حاجات في اللايحة متغيرتش؟

د.هيثم: زي ايه؟

عبدالرحمن: زي مثلًا المادة لو تاني مرة بردو بتبقى C؟

د.هيثم: ماشي ماهو احنا بردو لسه على القديمة، أصل أقولك إيه الفلوس مش في اللايحة.

عبدالرحمن: مش فى اللايحة؟!

د.هيثم: آه الفلوس مش مكتوب فيها سعر الساعة احنا قولنا مين اللي بيحددوا كل سنة؟ الوزارة، يعني مثلًا السنة دي لما سعر الساعة زادت الناس راحت اشتكت أكيد انتوا عارفين، يعني اشتكوا رسمي فلما راحوا قالوا ده قرارنا احنا فلأ اللايحة مافيهاش سعر ساعة.

عبدالرحمن: تمام إحنا قبل السنة دي كنا شغالين على اللايحة؟

د.هيثم: آه وعندنا لايحة بس لم تعتمد.

عبدالرحمن: وكان فيه لايحة بس ماعتمدتش وأول اعتماد ليها اللي هى لمدة الخمس سنين.

د.هيثم: من السنة دي اللي هى اللايحة الجديدة، لكن قبل كدة كانت اللايحة القديمة.

عبدالرحمن: كنا شغالين على الإطار المرجعي.

د.هيثم: الإطار المرجعي، وكان عندنا لايحة بس لم تعتمد رسمي يعني كان عندنا إطار مرجعي ولايحة، يعني اللايحة دي قعدت تروح وترجع وتروح وترجع لغاية 2018 واعتمدوا واحدة جديدة (السنة اللي فاتت والسنة دي تقريبًا أو السنة اللي فاتت) فبالتالي أول ما نزلوها تطبق على الناس اللي داخلة.

عبدالرحمن: طب يا دكتور ليه الطلاب ملهمش الحق إنهم يشوفوا اللايحة دي؟ يعني أنا مثلًا دلوقتي طالب في 3 تخصص أنا مكنش ليا لايحة.

د.هيثم: لا هو بيبقى نازل brochure صغير فيه الـ aim وأنا لغاية دلوقتي مابقرأش اللايحة دي لأنها مش كلها تهمني لكن بنزل كتيب صغير فأنتوا لو عايزين اللايحة كلها ننزلها لكم. أصل هى بيبقى فيها كلام كتير أوي مايهمكش، قوانين وكلام كتير لكن الحاجات اللي تخص الطالب بنبقى منزلين دليل صغير كده.

عبدالرحمن: اللي هى الورقة اللي بتتوزع ديه.

د.هيثم: اه دي بيبقى فيها كل حاجة تخصك كطالب أو اللي تهم الطالب.

عبدالرحمن: وبتتغير كل سنة اصلا؟

د.هيثم: لا لا لا إحنا كلايحة قديمة ماتغيرتش إنما اللايحة الجديدة نزلنالهم حاجة تانية.

عبدالرحمن: يعني أنا مثلًا دلوقتي عشان 3 تخصص مليش دعوة بالكلام ده.

د.هيثم: لا اللايحة دي بتطبق على الطالب الجديد.

عبدالرحمن: يعني أنا شغال على الإطار المرجعي.

د.هيثم: اه واللايحة.

عبدالرحمن: واللايحة القديمة اللي معتمدتش؟

د.هيثم: لا هى مش ماعتمدتش، هما كانوا اعتمدوها وكان فيها بعض التعديلات وعدلناها وقالوا عدلوها تاني وشوية قصص كده لغاية ما في الآخر قالك خلاص أُعتمدت امال أنا بطلع نتايج ازاى وبخرج طلبة ازاى؟

عبدالرحمن: يعني هى مثلًا بتعتمد كل سنة؟

د.هيثم: لا أنا دلوقتي خلاص خدت لايحة بخمس سنين زمان كانت كل سنة.

عبدالرحمن: ايه الجهات المختصة اللي بتوافق على اللايحة دي؟

د.هيثم: الوزارة

الوزارة كانت عاملة لجنة واللجنة دي من جامعة القاهرة بس بموافقتهم هما زي ما بيجيلنا مثلًا فاكر اللجنة اللي جت قريب دي.

عبدالرحمن: آه

د.هيثم: بيعملوا نظام بس بيختاروا دكاترة من جامعات حكومية وبيقولولهم اعملوا زيارة للأكاديمية وادونا تقييم، فالوزارة هى اللي بتحدد الدكاترة، في دكتور من جامعة القاهرة هو اللي كان بيراجع بناء على ترشيح الوزارة ليه فبيبعتوله وهو بيوافق فبيبعت الموافقة فبيبعتوه.

عبدالرحمن: طب يا دكتور ليه لغاية دلوقتي مفكرتوش في التسجيل الإلكتروني؟

د.هيثم: والله احنا بنفكر في التسجيل الإلكتروني وطبعًا هيبقى فيه جزء مادي بس الحقيقة من ساعة ما جت الدكتورة منى وإحنا طارحينه يعني وعارضينه على رئيس مجلس الإدارة بس أنا بردو مش شايف أن هو ده اللي هيرضي الطالب بردو لأن التسجيل الإلكتروني أنا هحط فيه قيود كتيرة جدًا.

عبدالرحمن: وبردو لو اتحط للطلبة بطريقة standard هيريح الطلبة.

د.هيثم: بص أنت عارف احنا مشاكلنا في التسجيل ايه، ايه مشكلة الطالب؟ في السكاشن ما أنا بردو لما هنزله اونلاين الطلبة بردو هيبقى عندها مشاكل مش هفتحها لكل الناس هفتح بردو لكل فئة زي ما عملت 5 في 5 في 5 المشكلة احنا مرة عملنا فكرة اونلاين أن الطالب يدخل يقولك تسجيلي متحطش ده أيام النتايج الطلبة اشتكت أن السيرفر بيقع كتير وبيعلق، فأنت لما تعمل النهاردة سيرفر عايز يخدم 5000 طالب وكله عايز يدخل يلحق السكاشن هاتلاقي السيرفر وقع واللي يقولك تسجيلي محصلش الكلام ده ممكن يتعمل آه بس محتاج دراسات كبيرة ومحتاج system قوي و budget قوية وإحنا مقدمين بروبوسال على فكرة لرئيس مجلس الإدارة بس مش هو ده اللي هايرضيكوا بحكم أن أنا ماسك التسجيل كنت ماسك مكتب وبعد كده مسكونى كل المكاتب المشكلة في التسجيل والزحمة الرهيبة اللي تحت دي سكاشن، أنا كنت عملت للطلبة system مش عارف انتوا عرفتوه ولا لا انا كنت هاخلي الطالب يجي بميعاد.

عبدالرحمن: اللي هو موضوع الرقم؟

د.هيثم: اه بس اتلغى الميعاد، الطلبة جم هنا وعملوا موضوع كبير جدًا واتلغى الميعاد وقالك عايزين باللي يلحق وبيقفوا الوقفة اللي أنت بتقفها دي، لا ده موضوع كبير أوي ازاى متعرفوش عنه؟

عبدالرحمن: اه اللى هما جم وقعدوا

د.هيثم: اه اه المشكلة كانت في ايه؟ السكاشن بردو أنت النهارده عملتلي مواعيد مش هعرف اجي أنا وصاحبي أنا عايز اجي أنا وصاحبي ونقف ورا بعض عشان ايه؟

عبدالرحمن: يسجلوا سوا.

د.هيثم: اه طب أنا اعمل ايه؟

عبدالرحمن: هو المشكلة يا دكتور في موضوع الميعاد ده سبب خناقة الطلاب.

د.هيثم: أيوة طبعًا أنا عاملها system أنا بعد ما عملته وجهزته لغيته.

عبدالرحمن: لغيت المواعيد؟

د.هيثم: اه ما هما اللي طلبوا كده هما اللي طلبوا كده الناس تيجي تقف من الفجر والكلام ده أنا كنت هعملك system الساعة تيجي 12 اتفضل، الساعة تيجي 12:30 اتفضل، الساعة تيجي 1 اتفضل، قالي طب ما أنت كده هتخليني ملحقش السيكشن الفلاني طب أنا أعمل إيه ماهو كده كده في حد مش هيلحق وواحد يقولك أصل أنا لازم أسجل مع فلان أصل أنت كده ضايقتني أنا عايز أحضر مع كذا، هما اللي طلبوا أننا نسيب الأرقام فالطلبة اللي يلحق، فالتسجيل السنة دي كان هادي جدًا لولا الحتة دي ما هو أنت الزحمة دي كلها كده لكن احنا لو ممشينها بالمواعيد كان زمان سيادتك بتيجي وتسجيلك رقمك 50 فتيجي الساعة 2 مثلًا ليه تيجي من الفجر هتيجي متلاقيش حد.

عبدالرحمن: طب ليه الجامعة تنازلت في نقطة زي دي؟

د.هيثم: هما الطلبة شافوا أن ده نوع من أنواع العنصرية وأن بتميز طالب عن طالب مش ده كلامك ولا ده كلامي؟ ده كلامك طب وأنت ليه الطالب رقم واحد ده ياخد سيكشن وأنا رقم 60 ماخدش سيكشن وأنا كنت رافض جدًا لغاية ما دكتورة منى قالت هما عايزين كدة هما أحرار.

عبدالرحمن: هو الفكرة في حتة العنصرية ديه هو في حتة التسجيل لو كنتوا مقلتوش للناس بأولوية الـ GPA.

د.هيثم: لا بص الموضوع مش بأولوية الـ GPA أنا اللي فكرت في الموضوع ده، النهاردة لما تيجي تعمل فكرة جديدة تخاطب مين الأول علشان تنجح؟ المهتم صح كده؟

عبدالرحمن: اه.

د.هيثم: فأنا دلوقتي عايز أنّجح فكرة أخاطب مين؟ فقولت الطلبة اللي هاتجيلي في أسبوعين من الإجازة أكيد الطالب الشاطر فقولت أنا هكتب على الـ GPA عايزين أرتب العكس مفيش مشاكل أصل هى سيان أنت دلوقتي عايز تبتدي تسجيل قبل الدراسة بأسبوعين تتوقع مين اللي يجي؟ مين بيحضر أول يوم دراسة وبيدخل سكاشن من أول اسبوع؟ يبقى أنا طبيعي أكلم مين؟ أنا اتكلمت بمنطق العقل لكن مقصدتش حاجة بدليل أن أنا عملت كل يوم 5 لكن لو أنا عايز أميزهم كنت اديتهم السكاشن براحتهم والأماكن دي أنا اللي بحددها وشاشتي الوحيدة اللي بتعمل كده.
5 أماكن وخلاص ولغاية آخر يوم كان كل الناس ليها أماكن بس كل واحد بقى ويقولك صاحبي وعايز أكون مش عارف ايه تعملها ازاى؟ وهاتيجي تبص تلاقيها معادلة صعبة جدًا فأنا كنت هاعملك سيستم يتحددلك ميعاد وتوقيت تيجي فيه بس أنا والراجل ده أصحاب فأنت هتقولي تعالى الساعة 1 وهو الساعة 3 اذًا فمستحيل نكون في نفس السيكشن طب وأنا مالي طب ما أنا كان كل أصحابي الأنتيم حرف الألف وأنا حرف الهاء وعمرنا ما حضرنا مع بعض إيه المشكلة؟

عبدالرحمن: طب ما يحصل موضوع الحروف الأبجدي.

د.هيثم: هايقولك بردو أنت مضطهد بتاع الـ ه والـ و والـ ي، أعملها، بصوا لو كانت المشكلة في الأبجدي كنت عملتها أبجدي أنا كده كده بخدم 5000 طالب بصوا أنا نظرتي غير نظرتك أنا باخدم 5000 طالب تمام؟ أبجدي أو GPA أى ترتيب يعجبكوا أنا موافق عليه أنا يفرق معايا في إيه؟ أصل أنا مضرور في إيه؟ بس أنا قصتي مش الأبجدي أنا قصتي أن (قلت الدراسة بأسبوع) مش عايز أفشل النهاردة لو أنا بدأت قبل الدراسة بأسبوعين والطلبة ماجاتش هعمل ايه؟ مش معقولة مش هسجل لكل الطلبة دي أنا المفروض بسجل في اليوم ل 400 طالب علشان أخلص وبعمل لده خطة مستعد أوريهالكم أنتوا ممكن تصوروها وتنزلوها للطلبة.

عبدالرحمن: لا احنا عايزين نصور كل حاجة حضرتك قولتها.

د.هيثم: ماشي الخطة معمولة على 3 اسابيع يعني أنا على 3 اسابيع أكون خدمت ال 5200 طالب واحنا عاملين الخطة قبل الدراسة بأسبوعين وأنا والدكتورة منى قاعدين بنفكر لو الطلبة فاجئونا وماجوش أصل إجازة مصيف باسافر باتفسح ما هو بردو ممكن حد يقولك متجبنيش في الصيف تجيبني ليه؟ فقعدنا نفكر نبتدي بالـ GPA الأعلى ولا الأقل فاخدنا الأعلى عشان دول أكثر اهتمامًا هيبقى عندهم حذر وفعلًا ده اللي حصل يعني أول اسبوع كان كله تمام دخلنا في التاني التخلفات زادت دخلنا في الثالث التخلفات زادت فتحت بعد الأسبوع التالت أسبوعين مش عشان أول اسبوع.

عبدالرحمن: الأسبوع التالت ده اللي كان أول اسبوع دراسة؟

د.هيثم: آه بالظبط وفتحت بعديه أسبوعين تانين ليه بقى؟ عشان الناس اللي ماجاتش إذًا فأنا لو كنت بدأت بيهم كنت فشلت أكيد كنت فشلت لكن لو هو اللي يريحكم الأبجدي مفيش مشكلة بس هيجي حد يقولك وأنا مالي فأنت هاتيجي تحسبها يمين شمال، احنا خدنا في الهندسة إن أى system هاتعمله هايبقى فيه مزايا وعيوب والكمال لله مهما عملت يعني أنت بتحاول تدور على الحاجة الـ optimum أنا اللي فكرت فيه أول اسبوع مين بيجيلي مين بيحضرلي الطلبة المهتمين فدايمًا المهتم ده هو الشاطر فأنا لو قلتله تعالى قبل الدراسة هاييجي، جه وإحنا كنا خايفين بردو الطلبة كلها ماتجيش ماهو المشكلة عندي إدارية بردو إزاى لما انزل معيدين من بيوتهم في الإجازة والموظفين اللي شغالين هنا فهانزل منظومة كاملة وفي الآخر ماحدش يجي فعلًا لو ممكن حد مكنش جه كانت بقى مشكلة بيني وبين الناس دي أنا عندي في مكتب التسجيل 35 واحد بيشتغلوا طب أقولهم ايه؟ نزلتهم والطلبة مجتش وكمان بعد الدراسة هنزلهم تاني عشان الطلبة اللي مجتش دي يسجللهم فهابقى نزلتهم أد إيه؟

عبدالرحمن: مرتين..

د.هيثم: فانت بردو لما تيجي تعمل فكرة تدرسها من جميع النواحي لأن الموضوع مابيبقاش سهل.

عبدالرحمن: طب هو ليه مايكونش فيه موظفين مختصين بالتسجيل بس أو موظفين يقدروا عشان ينزلوا؟!

د.هيثم: مينفعش موظف مينفعش الـ Advisor يبقى موظف، أنا راجل معايا 3 دكاترة ومعايا حوالي 30 معيد ومعايا طبعًا موظفين أنا بيجيلي مشاكل الطالب يجي يقولي ايه التسجيل ده؟ ايه رأيك فيه؟ أقوله لا يبني مش صح هو بيبقى حاسس وكمان أنت لما بتتكلم مع معيد هو بيبقى عارف الأبعاد العلمية وعارف المقرر السهل والمقرر الصعب فأنت بتقدر تستفيد منه التسجيل ده مش مواد وبس امال هما عملوا Advising ليه؟

عبدالرحمن: أنا عندي مرشد أكاديمي يكون على مرحلتين يعني أنا مثلًا عشان حاسبات مكنش ليا مرشد أكاديمي وكان فيه شخص وأنا داخل اسأله فبيقولي معرفش أنا اول مرة أقعد القاعدة دي.

د.هيثم: خد بالك الناس دي لازم تكون خبرة أنت قسم ايه؟

عبدالرحمن: حاسبات..

د.هيثم: طب أنت بتتكلم عن م. زكريا، كلم م. إيهاب الحناوي الناس دي هتلاقيها حفظت اللايحة حافظين المواد وعارفين الصعب إيه والسهل ايه ويقدر يديلك سريعًا كده التوليفة اللي تظبطك فالطلبة مبتشتكيش منهم لو حولتها لموظفين هيحصلي مشاكل على فكرة تحويل الموظفين، ده هيوفرلي جامد جدًا تكلفة مادية أنا لو قلتلك مكتب التسجيل ده بياخد شهريًا قد ايه. هيوفرلي جدًا لأني بنزل المعيد ده بفلوس بس ساعتها هبقى عايز Advisor قوي طب الـ Advisor القوي ده هياخد مني كام لو نجحنا نعمل ده بس بردو مشكلتي الكبيرة في الزحمة.

عبدالرحمن: حضرتك حاطط سبعة بس يسجلوا أنا جيت من بدري.

د.هيثم: حاسبات عندها مشكلة في تسجيل المستوى الثاني وأنا هاغطيها أنا هجيب الطلبة بنفسها تحدد تخصصها من بدري ليه بقى أنت لو مش محدد أنت طالع من كهربا.

عبدالرحمن: دخلت التدريب..

د.هيثم: لا التدريب مالوش دعوة فيه ناس خدت تدريب ومرضيتش، المشكلة بقى أن الطالب بيبقى فاهم حاجة غير الحقيقة يعني طالب مثلًا في المستوى التاني لا أنت مش في المستوى التاني أنت عرفت منين إنك مستوى تاني الطالب طالع من كهربا قدام اتصالات وايه؟

عبدالرحمن: حاسبات..

د.هيثم: مين قالك أن أنت حاسبات أنا بطلع كله اتصالات وبعدين بناء على رغبتك بنقلك فأنا مببقاش عارف بعمل ورقة رغبات وبنزلها ولا حد بيسأل فينا.

عبدالرحمن: بس ورقة الرغبات دي كانت موجودة.

د.هيثم: في المستوى 0، كلها اتغيرت والطالب من حقه ماقدرش أمنعه.

أنا مكنتش ساعتها عارف انتوا كام أصلًا، انتوا كاتبين اتصالات حتى د. ريهام كانت دايمًا بتكلمني في الموضوع ده حتى كانت بتاخدكم لوحدكم وبتخلي حد يشغلكم لكن انتوا في التوزيعة بتاعتي مش حاسبات لأني معرفش مين حاسبات أنا معنديش مشاكل أنا دلوقتي فاضي اهو معنديش مشاكل قولوا للطلبة اللي في كهربا اللي عايز يجي حاسبات يجي يكتب رغبته اتفقوا معايا وأنا اعمل template.

عبدالرحمن: طب ما ممكن طلبة تحول محدش ضامن.

د.هيثم: تمام بس على الأقل هكون قللت الـ error، على الأقل الطالب يبقى عايز يحول رغبته دي بقى غلطته لكن أنا في مستوى 0 عملت رغبات كلها اتغيرت الطالب بقى والتدريب وكله بيتغير في طالب لسه محول النهاردة..

عبدالرحمن: محول النهارده ؟!

د.هيثم: اه راح عمارة وفشل وبيقولي لو سبتني أنا كده بضيع أنت كده بتضيعلي الترم على الفاضي طب أنت يابني والتدريب يقولي مش مهم فأحنا بقى عملنا تدريب بيوقف مادة علشان نخلص من الموضوع ده لكن القصة دي أنا عارفلها حل لكن القصة أن الطلبة مابتستجبش، الطالب بيخاف يديني قرار لأنه بيبقى متحير في القرار ده فيه طلبة دخلت اتصالات ورجعوا ودخلوا ورجعوا، خايف، فدي كانت مشكلة مش بأيدينا مش هاعرف بتوع حاسبات بس خلصناها على طول أول ما عرفتهم بص طول ما في زحمة مفيش مواعيد أنا من أكتر الحاجات اللي زعلتني التيرم ده أن اتلغى المواعيد أنا كنت عايز مواعيد عايز أخدم طلبة 2020 اه هعرف هكلمهم فأنا كان نفسي في الموضوع ده الصراحة لأن الطلبة بتيجي تقف من الفجر والموضوع اللي احنا قولنا عليه فأنت بتلاقي نفسك بتحارب 50 جبهة وفيه مشاكل بتظهر أكيد بس ممكن تتحل لو الزحمة الرهيبة دي مش موجودة لكن أنت كل واحد يعني فيه أولياء أمور جم واتخانقوا أنا ليه اجي من الفجر اخد رقم وأقعد للساعة 3 أنا مش فاضي طب يا عم ابنك االي طلب كده لا مطلبش طب ما أجي وسيبه في اتحاد الطلبة لا وأنا مالي يعني أنا مرة جبت عبد الرحمن رئيس اتحاد الطلبة وكنت بجيبه أأقعده في مكتبي وبقوله اتفرج علشان ينقلكم الصورة عشان الناس الناس زعلانة كان بيجي يقولى الله يكون في عونك طب هانعمل ايه؟ محدش عاجبه حل، كل واحد عايز يجي يحقق الحتة اللي هو عايزها ويجري طب ما أنا بفكر في كل دول!