أصغر أصحاب شركة ناشئة في قمة RiseUp

في لقاء خاص وحصري مع مودي بولس وعمرو نجيب, أصغر أصحاب الشركات الناشئة في قمة RiseUp 2016.



في الحدث اللي ضم رموز كبيرة في المجال الإقتصادي, أصحاب أنجح الشركات الناشئة والمستثمرين كان من الملفت إننا نلاقي اتنين من أصغر مؤسسين الشركات.

مودي بولس وعمرو نجيب -١٥و١٦سنة- مؤسسي Imaginators. بدأوا مشوارهم وهم عندهم ٨ سنين ونص, بتصميم الجرافيك وبعدها بفترة جتلهم فرصة إنهم يروحوا ملتقى المصممين اللي كان المفروض يعرضوا شغلهم فيه عن طريق شرائح العرض التقديمي, اللي استنزف وقت كبير وطاقة مهولة وللأسف مطلعش بالصورة اللي اتمنوها.

فبالتالي قرروا يعملوا آلية من خلالها تقدر الناس يعملوا عرض لمواضيعهم بشكل محترف أكثر ويكون غير نمطي ويزود التفاعل فيها مع كل حاجة حولهم. ومن هنا جت فكرة Imaginators.

طوّروا منه ٣ نُسخ لحد ما وصلوا لآخر نسخة. كل نسخة كانت بتُختبَر الأول أكثر من مرّة عشان تكون مناسبة للمُستخدِم وأي نتيجة جديدة بتطلع بيطبقوها في النسخة المُعدلة اللي بعدها.

وبيشتغلوا حالياً على مركز المساعدة الخاص بالموقع، وكمان على فيديوهات بتوضح كيفية استخدام البرنامج.

حلمهم إنهم يوصلوا بمشروعهم للسوق العالمية مش بس للاستخدام المحلي وينافسوا بيه أكبر المصممين.

وقبل Rise Up جتلهم دعوة لwebsummit اللي كان مُقام في البرتغال من شهر بس قابلتهم مشاكل كثيرة تضمنت ضيق الوقت وإن المشروع كان لسه مخلصش تماماً فبالتالي قرروا إنهم يستنوا Rise Up علشان يكونوا على أتم استعداد وكمان يكون أول إنطلاق لمشروعهم من مصر.

لسه مستني الوقت والظروف المناسبة علشان تبدأ تحقق حلمك؟