ماس كوم: هاتولى راجل!

إستطلاع آراء بعض طلاب كلية الأعلام الذكور حول معاناتهم مع التفرقة بين الجنسين



“مش بنقعد مع بعض… بس لما باشوف واحد منهم من بعيد.. لازم اجري  له و لو الجامعة كلها عشان اسلم عليه…”

نتحدث اليوم عن من تسمع عنهم و لكن لا تراهم… من يتحركون من حولك و لكنك لا تشعر بهم… ليسوا اشباحا على العكس هم اناس عاديون… ضحايا “الستريوتايبنج”…. دائما تنعتهم ب”الفرافير” و “التنكين” و “الفشلة” و “بتوع البنات”… تحكم عليهم بدون ان تعرفهم لان الحكم على الاشخاص اسهل مما نتصور… نعم… اننا نحكم على الكتاب من غلافه الخارجى… و الدليل على ذلك اننى عندما سألت عن شباب ماس كوم فى الجامعة… كانت ردود “الفريشمين” واحدة و هى “دول عيال فرافير و تنكين”… اما الكبار المخضرمين كان رأيهم موحدا ايضا “سيبك من الى بيتقال… احنا صحابنا فى ماس كوم و كلهم جدعان”….

و دليلى الثانى هو هذا المقال… من ساعدونى فيه هم انفسهم من اتحدث عنهم اليوم… لا يريدون مقابل… فقط ساعدونى لانهم “جدعان”…

و بما ان الارادة تصنع المستحيل… فلقد وجدناهم رغم قلة عددهم… فكرت كثيرا كيف اتحدث عنهم و فى النهاية وجدت ان الحل الامثل هو ان ادعهم يتحدثون اليكم بانفسهم…

اعزائى القرآء… اقدم لكم… شباب “ماس كوم”….

 ما هى معاناتك فى المحاضرات و مع الدكاترة؟

– الدكتورز يدخولوا على الطول من غير “سير” و لا اى حاجة… يقولوا “ليديز” كأننا مش موجودين

– كولاد احنا أقلية جداً… تقعد فى محاضرة فيها ولد واحد و ستين الف بنت فا دى مش حاجة حلوة خالص… و معلش يعنى الـIQ بتاع البنات منخفض شوية… انا عملت drop لمادة بسبب الموضوع دة! بيقعدوا يسألوا كتير اوى! (طب ما جايز دة من باب الفضول!) لأ دة غباء! و فى المحاضرة بقى انت ولد فا قوم اعمل و قوم جيب… الشغال بتاع المحاضرة!

– من اكتر المشاكل ان عدد البنات اكتر بكتير من عدد الولاد…

– من اول يوم فالجامعة.. انت داخل المحاضرة … كلها بنات مفيش ولاد خالص… لما الموضوع يدخل فى group project مع البنات بيبقى ازمة جدا…

– التعليم حلو و الكلية سهلة… بس المشكلة بالنسبة لى بقى الـoffice hours و لو فى اى حاجة تعالوا و فى الاخر مش بيشرحوا حاجة… اما الشغل فاحسن شغل اشتغلته كان مع البنات… هى ملهاش علاقة ولد و لا بنت… بس بردة كان نفسى يبقى فى ولاد مش ابقى حاسس انى قاعد لقيط كدة!

– انا مش بلاقى اى مشكلة ان انا الولد الوحيد اللى فى المحاضرة.. بالعكس انا بخلص محاضرة و اطلع اقعد مع صحابى الولاد عادى

– شغل الـprojector …و روح اعمل كذا دى عادية… المعاناة فى حاجة واحدة… الدكتورز يقولوا انت ولد استنى شوية.. يعنى ممكن اكون جاى اول واحد و يقولولى استنى اصل فلانة متأخرة و عندها assignments طب ما انا عندى نفس الـassignments برده! و لازم الدكتور تشوف شغلى فى الاخر او ماتشوفش خالص… علشان انا ولد لازم اتشقلب!

– كنت عايز احول فى الاول علشان ماكنش فى ولاد غيرى… الولاد البره فاكرين اننا زايطين علشان البنات كتير… بس هى مش بتمشى كدة…

– أي محاضرة كلها بنات… ممكن مثلا 30 بنت و ولد واحد… و الدكاترة بقى تقعد تتريق علينا و انت مش جاى تتجوز يا حبيبى… و الله عادى… ماس كوم دى كلية و انا ممكن اكون جاى اتعلم عادى جدا!

 ايه رأيك فى بنات ماس كوم؟

– بينموا.. بيتكلموا عن الميك اب… زيهم زى اى بنات تانية… لكن قعدة البنات بتطلع حاجات غريبة… يعنى ايه “انا جعانة بس مش عايزة آكل”! (دى جملة عادية!) ايوة عادية بالنسبة لكم… انما انا كولد لو جعان هاروح لاقرب food source … مش هافضل اللى هوا لأ انا جعان بس الدنيا ظهر دلوقتى ماينفعش بطاطس لازم نوتيلا… اية؟! بجد!

– يالاهووووااى… امبارح كنت فى الكوافير مش عارف اية و بكره عندى فرح مش عارفه هالبس اية… يالاهووواى.. لأ لأ! و اللى فى نص الـمحاضرة تفتح الموبايل و تصور الدكتور… طب ليه يا بنتى كدة؟! (بس اكيد مش كلهم كدة؟) يعنى.. الاغلبية كدة..

– هى مشكلة بنات ماس كوم عامة انهم بيضحكوا كتير على حاجات تافهة… دى المشكلة الرئيسية..

– هتلاقى فى المنفسنة… و اللى عايزة تعمل كل الشغل و الباقى مايشتغلش.. و الرغى الكتير… طب يا جماعة عايزين نشتغل!… انا مابحبش الـgeneralization بس الاغلبية كدة يا اما تفاهة زيادة… يا اما رغى زيادة… يا اما معقدين.. و فى نوعيات بنات كويسة فانا مقدرش احكم و اقول بنات ماس كوم كلهم وحشين بس الاغلبية كدة..

– بيبقى فى حوارات تافهة بس و الله مش شرط بنت ولا ولد… احنا الرجالة ساعات بنتكلم فى حوارات تافهة…

– فى بنات رزلة و سخيفة و فى بنات كويسة تقدر تتعامل معاها عادى… و كلامهم مش على طول على الميك اب… ممكن تلاقى الكلام بتاع انا صاحبت انا فركشت انا خرجت مع صاحبى… بس اكتر نوع باكرهه هم البنات التنكة اللى شايفين نفسهم.. و احنا بتوع جاردن سيتى و انت ماتتكلمش معانا… على اية! زيك زى اى واحدة قاعدة هنا!

– الشغل مع البنات مش متعب بس لو جروب بروجيكت بيبقى فى استهبال… البنات بيشايلوك كل البروجيكت… خد انت الـ15 points دول و احنا هانقسم خامسة علينا… مع ان اصلا البنت بتشتغل اكتر بكتير من الولد لأن بالها طويل… مش بعانى لما يتكلموا عن الشعر و الميك اب.. بس بابقى قاعد كدة اللى هو مممم.. تافهة اوى !يعنى هى دى اقصى مشاكلك فى الحياة! بس قشطة يعنى مابعترضش على حد بيتكلم… بس برده انا الحمد لله اعرف بنات كتير اوى جدعان فى ماس كوم…

– متعبين فى الشغل… كل شوية مش هاعرف انزل و بابى بيقفش… و قلق قلق قلق مش هانلحق نسلم… و فى الاخر تلاقيهم هما اللى بيجيبوا درجات… و معظمهم مابيشتغلوش و ينزلوا يلعبوا و يضحكوا و يتكلموا فى حوارات تافهة… اوحش حاجة فيهم التفاهة و الرغى الكتير.. و بالذات لما الموضوع يخش فى marketing و advertising بتلاقى افكار تافهة و يقعدوا يسوحوا نفسهم.. و تلاقى فى النص ” طب هنلبس اية؟”… بس الصراحة فى بنات كدة ما شاء الله عليهم.. دماغ… يعنى الواحد بيتبسط و هو قاعد معاهم…

ايه رأيك فى اللى بيقولوا عنكم “عيال فرافير”؟

– بصراحة محدش قالهالى فى وشى قبل كدة… هما شايفين اننا بقى بنمشى بكاميرا فى كل حتة فكدة نبقى فرافير بس لأ احنا مش فرافير خالص و الله العظيم الحمد لله…

– بصراحة بقى فى ناس بيسوأوا سمعتنا فى الجامعة… و بيخلوا الناس تاخد عننا فكرة وحشة…

– هو محدش يحكم على حد من غير ما يتعامل معاه… بيقولوا كدة علشان بيلاقونا قاعدين مع البنات… طب ما انا بحكم شغلى لازم تكون صداقاتى البنات اكتر… و كل الناس بتفتكر كدة فى الاول لحد ما يعرافونا كويس و يكتشفوا عكس كدة… و مش ماس كوم بس… الناس عامة بتحكم غلط فى الاول…

– فى ولاد فى ماس كوم جدعان و فى ولاد مايختلفوش كتير عن البنات الحقيقة…

– هم علشان شايفينك على طول مع بنات… شغلك مع بنات… صحابك بنات… بياخدوا فكرة انك سيس بقى و الكلام دة كله… لكن انت ماينفعش تحكم من كدة… ممكن مثلا لو الدفعة فيها 15 او 16 ولد ممكن تلاقى منهم 5 مثلا كدة و الباقى كويسين و جدعان..

 طب فى ولاد بتدخل مخصوص ماس كوم عشان تعلق بنات؟

– انا مادخلتش عشان اعلق بنات! كان عدد البنات بالنسبالى صدمة اصلا بس خلاص اتعودت…

– فى ناس كويسة بس بتبقى فعلا دخلا عشان تعلق بنات… و فى ناس بتبقى دخلا عادى بس بيلاقوا بقى فرصة ذهبية… فبيستغلوها… ق…

– اكيد مش هاضيع 4 سنين علشان اعلق بنات صعبة شوية!

– فى ناس كدة كل هدفها انها تتعرف على بنات و فى ناس بتدخل ماس كوم علشان عايزين يعملوا حاجة بجد

 الناس واخدا فكرة غلط عنكم؟ تفتكر بيقولوا عليكم اية؟

– اه.. انتوا مش رجالة! انت يابنى بتدرس حاجات بنات لية؟! باحس انى متهان مع انى جايب فى التسعينات و جيت بارادتى.. انا متفوق!

– الناس فكرانا اننا بنلعب و ان الدنيا سهلة بس لأ احنا بنتعذب و نسقط عادى…

– لما الناس تعرف انى ماس كوم بيبقى انطبعهم وحش جدا… انتوا بقى ال13 ولد اللى فى ماس كوم وسط 300 بنت؟! فاروح انا رادد عليهم و اقولهم “لا! احنا 18” (بجد 18؟ طب هم فين؟!) مش عارف.. انا نفسى مش لاقيهم…

– اه,” انتوا مش رجالة! انتوا فرافير يالا!”

– فى ناس تقعد تقول يابختكم و مش عارف اية… و اللى يقولك دول عايشين براحتهم و تعالا جرب يوم فى هندسة…

– بيقولوا علينا عيال سيسانة… بس الفكرة بقى انه انا ممكن اشوف واحد فى هندسة او طب سيس عادى برده… و انا عندى صحاب كتير بيزنس و هندسة و عمر ما حد فيهم قاللى انت شكلك فرفور او سيسان او اى حاجة من دى علشان هم عارفين ان انا مش كدة.. بس فى ناس معانا فى ماس كوم انا باقول عليهم سيسانين.. هم بيبقوا باينين…

– اى حد فاكر ان انا علشان ماس كوم هاطلع مذيع.. دى حاجة انا بلاقيها كتير و باستغرب منها.. فى اقسام كتير فى ماس كوم… و فيه اللى بيقولوا ان ما دام فى ولاد فى ماس كوم يبقى هما يا اما فشلة يا اما داخلين علشان البنات..

– اه.. كل الناس تقعد تقول لى الكلية دى سهلة.. انتوا مابتعملوش حاجة.. انتوا متدلعين و انت قاعد تلعب مع صحابك البنات… بما اننا كتير اوى فى الدفعة… احنا سبع ولاد… فيقولك بقى انت بتيجى تقعد مع صحابك البنات و دى بتعمل reputation مش ظريفة..

– بيقولوا اية؟! بيحسدونى! متغاظين منى…

– صيدلة و اسنان اكتر ناس بتنفسن علينا علشان هم على طول مفحوتين… و احنا الدنيا عندنا اسهل و البنات كتير و كدة..

– تفتكر لو ماس كوم اتقلبت و بقت كلها ولاد و بنات قليلين يبقى احسن؟

– لا..لا.. انا مش طالب كدة… كل اللى انا عايزه انكم تراعوا مشاعرى.. راعوا رجولتى!

– لأ صعبة برده… لازم يبقى فى توازن

 ندمان؟

–  انا مش ندمان علشان انا باعمل الحاجة اللى انا بحبها…

– لأ مش ندمان انى دخلت ماس كوم…

– مش عارف و الله لسه هانشوف اول سنة… بس لأ مش ندمان يعنى…

– خالص.. عمرى ما ندمت و لا هاندم و دخلت الكلية دى عن اقتناع 100%..

– الموضوع بيضايق ان مفيش ولاد كتير فى كليتى… بس مش حاجة تخلينى ندمان…

– لأ طبعا.. لو كنت دخلت حاجة تانية ما كنتش هانفع خالص…

– ابقى ندمان لو جبت درجات وحشة فى الـfinals…

– لأ بالعكس.. انا اصلا كنت داخل هندسة بس طول عمرى نفسى ابقى مخرج… بس اشتغل الحاجة اللى بحبها بدل ما اطلع مهندس فاشل…

 لو عملوا gathering لكل ولاد ماس كوم هاتروح؟

– لو عملنا gathering انا اقولك ان 50% او 60% مش هايجوا اصلا…

– يا ريت و الله…

– هنروح اه بس التعارف مابيجيش كدة مش زى جواز الصالونات… هى مابتجيش كدة خالص!

– اه ليه لأ! على فكرة احنا ولاد ماس كوم كلها تعرف بعض… بس هى علشان كل واحد فى major مش بنتجمع… لما كنت freshman كنا بنقعد مع بعض… و فى مرة اتجمعنا كلنا صدفة و اتصورنا… و احنا اقلية فا بنبقى عارفين بعض…

– لأ.. زى ما قلتلك برده ماس كوم فيها شباب سيسانة… انا ماحبش اعرف واحد سيس… انا عندى كام واحد من ماس كوم هم دول صحابى…

– اه يا ريت… انا اصلا اكتر حاجة بتعجبنى فى اسنان و هندسة انهم groups … ماشى ممكن نقعد مع صحابنا البنات بس برده لازم نقعد تتكلم مع صحابك الرجالة… دى حاجة حلوة جدا… الواحد مش هايعيش طول عمره قاعد مع البنات!

 نفسك تقول اى حاجة؟

– نفسى التعليم فى ماس كوم يبقى هادف اكتر.. ساعات مش بنبقى فاهمين حاجة و فى دكتورز مابتشرحش و نخلى حد من بره او من سنة رابعة يعملنا الشغل.. ا..

– عايز افهم الناس ان مش معنى انك دخلت ماس كوم انك “سيس” و مش راجل… الموضوع مش بالكلية.. الموضوع بالشخصية و التربية و المواقف و التعامل مع الناس و حاجات كتير تانية اهم بكتير اوى من انك تحصرها فى كلية كذا…

– مستغرب ليه الولاد مش بتدخل ماس كوم!

– الولاد و البنات فى ماس كوم بيطحنوا و مش كل الولاد اللى رايحيين ماس كوم رايحيين علشان بنات و مش كل البنات اللى فى ماس كوم وحشين… فى بنات كتير جدعان…

– اى حد ثانوية عامة و عايز يخش ماس كوم عشان يعلق بنات… باقول له بلاش