إزاي تبقى أنت الإضافة(ADDED VALUE) لأي شركة وتتعين فوراً!!

اضمن الوظيفة في جيبك في سبع خطوات.



1 } الوعي الذاتي(SELF AWARENESS)

────────────

أنت مين؟ ورايح فين؟ وليه؟ من تعريفات الوعي الذاتي الكتيرة لازم تبقى على وعي و إدراك كامل بثلات مجموعات رئيسية عن نفسك وتحددهم كويس عندك، وكلهم لازم يبقوا متناسقين مع الوظيفة والشركة اللي مقدم عليها وإلا الفرصة هتروح منك.

1 – مهاراتك ومواهبك (Skills & Talents): وهم دول قواك الداخلية والخارجية.

2 – احتياجاتك ورغباتك (Needs & Desires): الحاجات اللي ناقصاك والحاجات اللي عايزها.

3 – نمطك الشخصي وقيمك (Personal style & Values): الحاجات اللي بتدوّر عليها في الشركة وأسلوب تعاملك عامة

وفيه مجموعات تانية بس دول الأهم مؤقتاً .

───────────

2 } الوعي العام (GENERAL AWARENESS)

────────────

لازم تدرس الشركة اللي مقدم عليها كويس من حيث حجمها في السوق، “مين منفاسينها؟ ومين شركاءها؟”، نوع الخدمات اللي بتقدمه وسمعتها مع عملائها، رأس مال الشركة وبيئة العمل الداخلية ومدى رضاء موظفين الشركة جواها.. وأي تفاصيل تقع تحت إيدك حطها في الحساب، بالإضافة أكيد إنك تعرف ( الرسالة – الرؤية – القيم الرئيسية ) للشركة اللي مقدم عليها.

ومتنساش تدرس“المنافسين” كويس وتحللهم وهتعرف ليه بعدين.

────────────

3 } التوصيف الوظيفي (JOB DESCRIPTION)

────────────

اقرأ بالتفصيل الممل وحلل كل حاجة مكتوبة في إعلان الوظيفة، طلع منه العناصر الآتية واكتبها في ورقة شاملة.

بالنسبة للوظيفة:

── ── ─

1 – الهدف الرئيسي من الوظيفة (Target)

2 – التحديات والمشاكل المحتملة (Problem solving/ Challenges)

3 – المهام والمسئوليات (Tasks & Responsibilities)

5 – خطوات العمل (Process)

6 – الأدوات المستخدمة (Equipment’s / Material used)

7 – بيئة العمل (Job environment & Culture)

بالنسبة للشخص:

── ── ─

1 – المؤهلات المطلوبة والقدرات (Required qualifications)

2 – المهارات (Skills)

3 – المعرفة (Knowledge)

4 – الخبرة (Experience)

5 – الصفات والسمات الشخصية (Personal traits & Personality)

────────────

4 } البحث والتحليل (SEARCH AND ANALAYSIS)

────────────

ابدأ دور في (مواقع التوظيف) و (LINKEDIN) على حاجتين:

1 – نفس “الوظيفة” اللي أنت مقدم عليها بس في أماكن تانية.

2 – نفس “الأشخاص” اللي بيشتغلوا نفس الوظيفة اللي عايز تشتغلها في الشركة.

وابدأ شوف الناس دي بتعمل إيه (زيادة) مش موجود في التوصيف الوظيفي للشركة اللي مقدم عليها. اكتب كل الزيادات سواء حاجات متعلقة “بالموظف نفسه” أو “الوظيفة نفسها”، وما تنساش برضو ترجع للمعلومات(Data) اللي جمعتها عن “الشركات المنافسة” وتكتب برضو الزيادات اللي بيعملوها.

────────────

5 } التعليم والتطوير (LEARNING & SELF DEVELOPMENT)

────────────

شوف الحاجات الزيادة اللي لاقيتها في الخطوة اللي فاتت من خلال بحثك وتحليلك، وابدأ حط لنفسك خطة إنك “تتعلم” الحاجات دي علم كامل وفي أسرع وقت ممكن. وابدأ “طور من قدراتك” بحيث إنك تبقى جدير “بممارسة و تطبيق” اللي اتعلمته، فتبقى جاهز بالعلم والتطبيق.

───────────

6 } خلق احتياج (NEEDS CREATION)

────────────

وأنت داخل الإنترفيو لازم تخلق“احتياج” عند الشركة للحاجات الجديدة اللي نميتها في نفسك. لو دخلت على الشركة وقلت لهم والله أنا اتعلمت واحد اتنين تلاتة.. الموضوع هيبقى زي قلّته لأن ببساطة“هما مش عارفين أهمية الحاجات دي وإلا كانوا نموها من نفسهم”.

فأنت دورك تقنعهم وتوعيهم بقد إيه الحاجات دي هتفرق مع الشركة سواء من حيث “الأداء أو الأرباح أو السمعة أو التطوير أو سد ثغرات و غيره”.. بكدا أنت خلقت شىء من عدم. وجدت احتياج ما كان له وجود ومش بعيد لو اتقبلت تمسك أنت القسم الجديد للحاجة اللي دخلت الشركة بيها لأنك اللي أوجدتها.

───────────

7 } الاستمرارية (SUSTAINABILITY)

────────────

عشان تضمن استمراريتك في الشركة لازم تحافظ على الحاجات اللي دخلت بيها، والاستمرارية مش هتيجي إلا لو “طوّعت” الحاجات دي وخلتها متماشية جداً مع “رسالة ورؤية وقيم الشركة (Mission , Vision , Core values)”فتضمن إنها هتطور المكان، والشركة هتهتم بيها، وبالتالي هتهم بيك كشخص لأنك الأساس وصاحب الفضل.

لو عملت الخطوات دي هتبقى الجوكر الحقيقي، اللي قادر يخلق للشركة حالة طوائ لتعيينه فوراً وبأقصى سرعة.

▬▬▬▬▬▬▬▬▬

كتابة: أحمد مصطفى المحلاوي