13 مؤهل ومهارة لازم تشتغل عليهم لو عايز تشتغل في أي مكان .. بأعلى سعر ممكن

الشركات مش عايزه الشخص اللي بيهتم بنفسه و بس، لكن عايزه الشخص المتطوع المؤثر في مجتمعه



13 مؤهل ومهارة لازم تشتغل عليهم لو عايز تشتغل في أي مكان .. بأعلى سعر ممكن

1 } التعلم الذاتي Self_Learning

────────────

إنك تقدر تتعلم أي حاجة لوحدك ومش محتاج حد يدرسهالك. مفيش شركة عايزة تدفع في تعليم الموظفين والأغلبيه عايزة ناس جاهزة ومتابع كل ما هو جديد في المجال.

────────────

2 } التدريب الذاتي Self_Coaching

────────────

ببساطة تقدر تتغلب على نقاط ضعفك وتطور من آداءك، وتزود إنتاجيتك ونقاط قوتك بنفسك. أنت كوتش نفسك ومسيطر تمامًا على حياتك.. إقرا عن التدريب على الحياه والأعمال التجارية وحاول تطبقه على نفسك وشركتك.

────────────

3 } الوعي الذاتي Self_Awareness

────────────

لازم تبقى عارف كويس أنت مين داخليًا، وعايز توصل لفين داخليًا المقصود بكده إنك تبقى على دراية تامة بشخصيتك، ونمطك الشخصي، ومهاراتك، وقدراتك، ومواهبك، وقيمك، ونقط ضعفك، وقوتك، واحتياجاتك رغباتك، وعواطفك وإهتماماتك.. كل كلمة من دول لازم تبقى عارف رد ليها بناءً على الملاحظة والتجربة.

────────────

4 } الوعي العام #General_Awareness

────────────

لازم تبقى عارف حاجتين: أولهم متطلبات سوق العمل بتاعك إيه وإزاي تنافسه وتقتحمه.. ثانيًا تبقى عارف كل حاجة عن الشركة اللي مقدم فيها: (رؤيتها ورسالتها وقيمها، ونوع البيئة جواها عامل إزاي، والهيكل التنظيمي، والتواجد في السوق، والمنافسين والشركاء، ونظام العمل والأجور..)

────────────

5 } التسويق الشخصي #Personal_Branding

────────────

إنك تكون عامل لنفسك إسم وبراند. التسويق الشخصي هو أول جملة بتتقال عليك لما يجي اسمك. لازم تكون في حاجة إيجابية ومفيدة للمجتمع ومؤثرة بشكل كبير. ويكون تواجدك على لينكد إن (LinkedIn) قوي جداً وعندك أكتر من ٥٠٠ صلة (Connections)، وسمعتك كويسة، ومشهود ليك بتخصصك وتمكنك في المجال.

────────────

6 } الإحترافية #Professionalism

────────────

لازم الإحتراف التام من أول السيرة الذاتية بتاعك يكون على المعايير العالمية و الإيميل  اللي بتخاطب بيه الشركة، والهيئة العامة تبقى شيك وملائمه لجو الشركة، ويكون عندك إتيكيت في التعامل، وبتحترم مواعيدك وبتسلم المهمات اللي عليك وجاد جداً في شغلك وبتعرف تِفصل الأمور الشخصية عن الأمور المهنية.

────────────

7 } الإتقان التام للغة #Language_Fluency

────────────

لازم تبقى متقن تمامًا للغة الإنجليزية ومتقن للأربع مهارات بتوعها سواء كانت قراءة أو كتابة أو محادثة أو إستماع وكل ما كان عندك لغات زياده; كل ما زادت فرص تميزك وقبولك للتعيين في البلد اللي بتتقن لغتها هتزيد.

────────────

8 } تعدد القدرات #Multi_Potentiality

────────────

هي التخصص في مجال واحد أو إتنين ولكن إنك تكون متعدد الإمكانيات وتقدر تعمل أكتر من حاجة، مش المقصود هنا تعدد المهام بإنك تعمل أكتر من حاجة في وقت واحد لأن ده أثبت فشله وبقى نقطة ضغف، ولكن تعدد القدرات المقصود بيها إنك تفهم في أكتر من مجال والشركة تقدر تستفيد منك في أكتر من قسم وتقدر تعتبرك الجوكر لو حصلت أزمة يمسكوك قسم جديد عشان هتقدر تتكيف وتتعامل معاه.

────────────

9 } التفكير الناقد #Critical_Thinking

────────────

ودي المهارة اللي بيتراهن عليها العالم على مر السنين الجاية إنها هتبقى المهارة رقم 1 في العالم المهني، والمقصود بيها إنك تعرف تحلل الأمور كويس جداً وتاخد قرارت سليمة وتكتشف العيوب والمميزات وتتنبأ بالمستقبل بناءً على الحاضر والماضي والدلائل المنطقية، ودي بيندرج تحتها: مهارة حل المشاكل ومهارة اتخاذ القرارات ومهارة التحليل كلهم هينوب عنهم التفكير النقدي.

────────────

10 } الذكاء العاطفي #Emotional_Intelligence

────────────

وهو أربع مراحل إنك تعرف أنت مين، وتسيطر على مشاعرك، وتعرف تقرا مشاعر الآخرين عشان توصل لآخر مرحلة وهو التواصل الفعال معاهم، وبيندرج تحته حاجات مطلوبة زي الإنتباه والتركيز مع التحليل، وده نوع من أنواع الذكاء..

────────────

11 } إحتراف التكنولوجيا

#technology_and_technical_professional

────────────

العالم كله بيتجه للتكنولوجيا، فلازم تبقى محترف تمامًا في حاجات أساسية زي البحث على الإنترنت و  برامج السوفت وير الخاصة بشغلك، وعلى دراية بلغات البرمجة وأنظمة التخزين الوهمي وغيره من التطورات التكنولوجية لأن ده بيزود من وعيك بطبيعة الشركة اللي أنت فيها حتى لو مش شُغلك الأساسي، وطبيعي جدًا تبقى محترف في برامج المايكروسوفت وما شابها من البرامج بس بالتجربة العملية مش بشهادة ICDL المنقرضة.

────────────

12 } المسئولية الإجتماعية #Social_Responsibility

────────────

الشركات مش عايزة الشخص اللي بيهتم بنفسه وبس، عايزة الشخص المتطوع المؤثر في مجتمعه بمشاريعه وأفكاره، اللي عنده إستعداد يتعلم عشان يفيد غيره لأن دا بيحقق ربح للشركات وبيعفيها من الضرايب وبيخلق جو عمل مثالي غير تقليدي، عشان كدة التطوع مهم جدًا جدًا لصورتك قدام الشركة مستقبلاً.

────────────

13 } التكيف والمرونة والتطوير

#adaptability #flexibility and #development

────────────

وهو الشخص القادر على التكيف مع أي تغيير  والمرن مش المتمسك والمتعصب والمتفتح على ثقافات مختلفة “بتبقى ميزة للناس اللي أخدت منحات برة”، وقادر إنه يطور من الحاجة بقدراته البحثية والتفكير الإبداعي بتاعه، سواءً تطوير منتج أو منهج أو تطوير آداء المؤسسة ككل، و دا هيتطلب من الشخص إنه يكون عنده دراية بآداءه وتقييمه عشان يسعى لتطويره.

▬▬▬▬▬▬▬▬▬▬▬▬▬▬▬▬▬

بقلم: أحمد مصطفى المحلاوي