5 طرق ممكن تساعدك على المذكرة

أزاي أذاكر بتركيز؟



إيه ده هو كمان في تيرم تاني! معظمنا لسه مش مستوعب أن التيرم التاني بدأ ومش متقبل فكرة أننا هنرجع نذاكر تاني بشكل أو بآخر. وبالتالي لما يجي وقت المذاكرة علشان الأمتحانات بنبقى مقفولين والمعلومات مش بتثبت في دماغنا، علشان كدة دورت على طرق ممكن تساعدنا على المذاكرة وتكون في نفس الوقت ممتعة نوعًا ما زي:

1-العقل السليم في الجسم السليم

لو حاسيس أنك مكسل ومش قادر تذاكر، أنسب حل ليك أنك تعمل تمارين لمدة 20 دقيقة، وتحط السماعات في ودانك، وتشغل الأغنية إلي بتحبها. ده هيسعدك جدًا على أنك التركز أكتر ويخلي ذهنك مستعد لاستقبال معلومات وفهمها أسرع. وده بيحصل لأن التمارين بتنشط الدورة الدموية وكل أعضاء الجسم فبالتالي عقلك بينشط.

2-التطبيق  المفضل عند الأهالي

ده تطبيق غالبًا بيلعب دور والدتك أو والدك وأحيانًا ضميرك، التطبيق ده بيمنعك من دخول مواقع التواصل الاجتماعي إلي بتشتت تركيزك لفترة قصيرة. وبالتالي كل ما تفكر أنك تفتح موقع من المواقع يجي التطبيق ده يقولك “الزم حدودك” فتركز و أنت بتذاكر.

3-أنت المدرس

علشان تضمن أنك فاهم إللي بتذاكره، اشرح لحد غيرك. يعني مثلًا اشرح لحد من صحابك أو أخواتك الصغيرة، فبتالي لما تشرح لحد تاني ده هيساعدك على أنك تركز أكتر في إلي بتقرأه وتفهمه أكتر وتشوف جوانب تانية ماكنتش شايفها. في حالة أن ماحدش رضي يجبر بخاطرك هات لعب أخواتك ومثل أنك بتشرحلهم، لا مش هتبان مجنون ماتخفش.

4-كلم نفسك بصوت عالي

لو جربت كل إلي فات ومنفعش، كلم نفسك بصوت عالي، أيوة كلم نفسك بصوت عالي، ليه؟ علشان لما تقرأ المعلومات بصوت عالي هتبقى بتشوفها بعينيك وتسمعها بودنك يعني بتعدي على مخك مرتين فتثبت وبنسبة كبيرة بتتخزن في الذاكرة طويلة المدى.

5-ابدع يا فنان

و لأننا بنحفظ الأغاني بسرعة، أحنا ممكن نحفظ أو نفهم المعلومات لو خلناها على شكل أغنية ليها وزن، كده هتعلق في دمغنا أكتر. أو ممكن نألف قصة صغيرة أو نرسم أشكال جنب كل جزء بنذاكره ترمز للفكرة أو نعلم على الكلمات المهمة بألوان مختلفة وده هيسعدنا أننا نفتكر المعلومة أسرع.

لو لقيت نفسك مكسل تذاكر حاول تجرب طريقة من الطرق دي ممكن تساعدك زي ما ساعدتني. طبعًا ديه مش الطرق الوحيدة للمذاكرة في طرق تانية مختلفة كتير، لو بتذاكر  بطريقة مختلفة ممكن تشاركها معنا.