للصحــاب

..في ناس أساميها مش حاضره ..بس المكان بيلم أكتر من حبيب ..حقيقي لأول مره بشكر النصيب علشان جمعني بناس ف كتفي ف كل صعب



ف القاهره
أوقات كتير بلقا الدفا
زي الصحاب الي ف حضن الليل
يخلو الشمس تطلع من جديد
أو زي صلاتي جهرًا كل عيد
بنلاقي لمه وحضن يملُكنا
الكون بحاله بيبقى راقص م الفرح
كان أبويا يجمع كل أحفاده
ويمد إيده ف جيبه تطلع بالمفيد
وأنا فين ي حج .. العب بعيد
يا عم فك الليله عيد
خمسين جنيه ألقاها تحت المخده
وابتسم
انزل قهاوي الحته وافرح بالسلام
الناس حقيقي طيبه ودا مش كلام
محمود بتاع القهوه يلمحني
الشاي بسرعه يجيلي فاضحكله
ف يقولي فين الشله مش حاضرين
عربيتي 28  بس بيقولي
هتركن الليموزين !!
خمسايه والقي الضحكه بتصهلل
الشله وصلت ضحك ع الهادي
القهوه بيت يحضني ويدادي
والشله رزق من الكريم
طارق يقولي خلاص هبدأ رجيم
نضحك عليه ونشجعه
ناجي انت فين .. رايح مشوار
وائل ..أكيد عندك حوار ف تتأخر
نضحك عليهم كلنا ونسكت
دخان شيشنا يعكر القعدة
ف بكح كحه من مفيش
قعدنا حلوه وضحكنا من غير حشيش
طب يلا همه عشان نقوم
اتنين من اصحابك كتافهم ترقص م النجوم
صحابي
أنا ممتنلكم جدًا
ل كل دقيقه عدت واحنا ع القهوه
أو مهرجان اشتغل وملينا الدنيا رقص
في ناس أساميها مش حاضره
بس المكان بيلم أكتر من حبيب
حقيقي لأول مره بشكر النصيب
علشان جمعني بناس ف كتفي ف كل صعب
لو حتى حرب
هتلاقي ضلع لكل واحد كان سلاح