٥ خطوات تلم بيهم أي مادة!

كتابة و تحرير: كريم يونس



٥ خطوات تلم بيهم أي مادة !

في بداية الكلام كدة، أنت مش محتاج تيجي دلوقتي وتبدأ تندم على المحاضرات والسكاشن اللي محضرتهاش مش ناقصة تضيع وقت اقسم بالله.
إنت قاعد دلوقتي بتقرا علشان تعرف هتلم المادة اللي قدامك إزاي علشان تدخل الامتحان تنقذ مايمكن إنقاذه فالوقت الحالي.
فركز معايا كدة علشان نعدي الوقت دة على خير، نسمي الله ونبدأ نقعد كدة ونذاكر علشان عندنا امتحان والموبايل دة تخلص قراية وترميه برة الأوضة خالص.

١- تفهم أنه أنت داخل الامتحان محتاج تجمّع أي درجات تيجي في إيدك، فمتستهونش بأي نقطة وأنت بتذاكر لأنها ممكن تكون أملك في الحياة في الفترة دي.

٢- تجيب امتحانات المادة دي من ساعة ما سموا المادة بالإسم دة وعرّفوا العلم دة أساسًا، وتقعد تتصرف وتحل الامتحانات دي.

٣- تعرف دماغ الدكتور اللي بيدي المادة ماشية إزاي وهو بيركّز على إيه، أغلبية الدكاترة بيحبوا نقط معينة كدة لازم تدخل أي امتحان تلاقيها في وشك، تقريبًا من أيام ما كان لسه مُعيد.

٤- بلاش تتوتر وتبدأ تفكر في مستقبلك اللي ضاع من دلوقتي، لأ لأ متخفش لسه فيه أمل لو سمعت الكلام بس وهديت كدة وركزت كويس وأنت بتذاكر.

٥- لو إنت ملقتش لا امتحانات المادة ولا فهمت دماغ الدكتور واتوترت-ومفيش فايدة معاك- يبقي افتح كتاب المادة وامشي خطوة خطوة وخطط تحت كل المعلومات اللي أنت حاسس إنها مهمة، و ياريت لو بقلم تحديد كدة -علشان دة هيساعد الذاكرة بتاعتك في إنها تفتكر كل المعلومات اللي كانت مميزة وأنت بتذاكر-

٦- لو عملت كل اللي فات دة ودخلت الامتحان ومحلتش، يبقى نصيحة أخوية لو أنت في أولى حوًل من الكلية دلوقتي أحسن أنت مش نافع، لو بعد أولى فعوضك عالله وقضيها بالطول والعرض.

اه صح متنساش لو لقيت الجملة دي
“مع تمنياتي بالنجاح والتفوق” ممكن تسلم الورقة بعد نص الوقت مايعدي عادي، وتعالى فالصيف كدة ونعيد نفس الخطوات دي تاني 😃