خفة يد مع فادي جاكسون

لأ مش سحر هو "خفة يد"،"فن الوهم"، فن ممكن تنبهري بأي حد بيعمل حاجه كويسة، اللي بيعزف كويس بطريقة مبدعة بتنبهري بيه، أنا بعتبره فن زي أي فن يعني ملوش علاقه بالسحر.



فادي فريد شوقي، خريج (2017) من كلية التربية جامعة حلوان قسم “رياضيات إنجلش”، واخترت اسم فادي جاكسون (By luck) كده، وأنا في (2) ثانوي كنت مُغرم ب”مايكل جاكسون” وبتفرج على حفلاته فلما دخلت مجال الماجيك إخترت اسم “فادي جاكسون”. إبتديت الموضوع من صغري؛ يعني بشوف الأجانب بنبهر بيهم بس مكنش عندي إني أتعلم كنت بشوفهم مجرد حاجة خارقة مش هقدر أوصلهم اللي هو دا مخاوي كنت ببرر لنفسي يعني أكيد دا فيه حاجة مش طبيعية لغيت من وقت قريب وأنا ف (1) ثانوي تقريبا إبتديت أخد الموضوع اللي هو أنا عاوز أتعلم، جربت حاجات بسيطه لقيتها لأ دا الموضوع فيه إنَّ بقا فيه س ف الموضوع، فواحدة واحدة ابتديت اتعلم (بيزكس) لغيت ما بدأت إني أحط التاتش بتاعي زي ما بيقولوا يعني أبدع، واعمل حاجات لنفسي.

 

البعض عنده موهبة فيه اللي بينميها، وفيه اللي بيركنها على الرف لكن سر شغفي إني اختار الكارير دا إني لقيت نفسي فيه قبل الموضوع دا كنت حاسس إن أنا بلا موهبة حاولت ارسم فشلت، حاولت أغني لقيت صوتي مش حلو، حاولت أعمل حاجات كتير ملقتش نفسي لغيت أما لقيت الموهبة دي ولقيت نفسي بعرف آديها من جوايا كدا لغيت أما اتعلمت وأكتر حاجة كانت سبب شغفي لدا؛ إن أنا بشوف الناس معجبة بالحاجة اللي أنا بعملها؛ يعني إن إنتي تشوفي حد بينبهر بحاجة في حد ذاته بيسببلك دافع.

-بتحس بحاجة وأنت بتقدملهم؟

-آه طبعا بتحسي بسعادة، بتحس إن أنت اللي بتصنع الابتسامة. يعني ابتسامة، انبهار دا كله لما بتشوفيه في عيون الناس ليكي بيسببلك سعادة بشكل غير طبيعي حاسة إن إنتي عملتي حاجة.

كل واحد فينا عنده شخص بيدفعه للخطوة الأولى وأكتر شخص كان بيشجع فادي من أول ما بقى عنده شغف للمسار دا أهلي والدي، والدتي، وأخواتي دول اللي بيسببولي دافع إني اعمل كل ما هو جديد.

-يعني أول حاجه عملتها أول حد شافها اهلك؟

-آه وكانوا بيتريقوا كتير، وبالذات أختي اكتر واحدة ممكن أعمل اللعبة لأي حد مش يعرف يكشف السر، اختي بالذات اقولها اللعبة تقولي آه السر هنا في الحاجة الفلانية، حفظاني ، قرياني.

هو نمبر وان بجانب اني خريج تربيه فهشتغل مبدئيا في التدريس، يعني في مصر لازم يكون عندك حاجه ثابتة بس مبدئيا هشتغل في التدريس، بعد كدا لو لقيت التدريس هياخدني عن الماجيك أنا هستقل للماجيك.

-فادي فضل يسمي اللي بيقدمه دا ب “خفة يد” مش سحر؟

-لأ مش سحر هو “خفة يد”،”فن الوهم”، فن زي أي فن يعني ممكن تنبهري بأي حد بيعمل حاجه كويسة ، اللي بيعزف كويس بطريقة مبدعه بتنبهري بيه، اللي بيعمل الألعاب السحرية بطريقة كويسة بتنبهري بيه، أنا بعتبره فن زي أي فن يعني مش سحر خالص ملوش علاقه بالسحر.

اللي بقدمه بيستغرق مني وقت و جهد.آه الإتنين، أولا؛  عشان أتقن لعبة معينة ممكن أقعد بالشهور عشان أفضل أتعلم محتاج ممارسة، ومجهود مني فبياخد الإتنين اكيد.

هو في مصر ممكن أحيانا مبيتقدرش، وأحيانا بينبصله بصة مش كويسة بالذات ان فيه ناس كتيرة يعني إن أغلب الناس يعني ممكن تخاف تسلم عليا وفي الجامعة مثلا قابلت نااس تقولي “لاء ابعد عني متلمسنيش” هو انا بضحك بس من جوايا بزعل. يعني مش متفتحين لحاجة زي دي هو عشان مش منتشر أوي جوا مصر فالناس مش بتديله قيمته يعني تحت بند زي فقرة” الساحر-الأراجوز” اللي هي الحاجات اللي مش بالقدر اللي أنا شايفه او بالقدر اللي أنا عايزه.

أكيد أتعرض عليا كذا بلد بس عشان في الجيش وكدا صعب دلوقتي فاخلص الجيش وأحاول أسافر لأن فيه حاجات إمكانيات وكدا.

-يعني تسافر بلد معينة وكدا، والجيش بردو كان المانع من إنك تقدم في أي برنامج من البرامج المشهورة؟!

-أكيد مصر بالنسبة للولاد ميقدروش يطلعوا برا البلد من غير تصريح للسفر وتصريح السفر دا بيطلع لما عندي موقف من التجنيد سواء انا خلصت او واخد إعفاء أو ما إلى ذلك وأنا لسه مخلصتش الجيش فاضلي شهريين.

-بالوقت والمجهود زي ما إنت قولت عليه قدرت تطور نفسك يعني قريت كتب، شفت فيديوز؟

بشوف فيديوز كتير وبطلع على كل وسائل المعرفة في الماجيك سواء قراءة أو فيديوز أو شات مع ناس برا فبحاول استفاد من كل النواحي يعني؛ لأن كل ما تعرفي أكتر تعرفي تبدعي اكتر.

أحب أقول لأي حد هيقرأ الكلام دا إن الموهبة مش شرط تكون حاجة معروفة، مش شرط تكون رسم، غنا، مش شرط تكون أي حاجة من اللي الناس عارفاها وتقول هي دي الموهبة. لاء المواهب كتيرة، ومتنوعة يعني أي حد بيعرف يتكلم مع حد ويسمع حد دي موهبة، أي حد بيعرف يضّحك اللي قدامه دا موهوب فمتسألش بأي حاجة. أنت مميز، فيك حاجه مميزة، ربنا خلقك فيك حاجة مش موجودة في غيرك، فحاول تدور لغيت اما تلاقيها، واشتغل عليها اكيد هتفيدك في حياتك.

-حوار: ناريمان أنور، ولاء عبد الرحمن.