التربية العملي

غرض التدريب أنه يعّد طالب كلية التربية أنه يكون مدرس ويزيل من عنده رهبة الوقوف قدام الطلاب



واحنا طلاب في المدارس كان بيدخلنا الحصص أحيانًا مدرسين صغيرين، كنا بنسأل نفسنا مين دول؟ وليه مش بيدخلوا الحصص كل يوم! تعالوا نعرف مين دول وكانوا بيعملوا إيه؟
زيّ ما طلاب كلية الطب والتمريض ليهم تدريب وغيرهم من الكليات، كلية تربية ليها تدريب، ولكن على طريقتها الخاصة عشان يكون التدريب في النهاية في مصلحة الطالب.
يوم من كل أسبوع بيتوزع فيه الطلاب مجموعات في مدارس على حسب المدرسة الأقرب للمركز اللي بيعيشوا فيه، بيلبسوا أشيك طقم عندهم، بيجهزوا الشنطة اللي بيتوفر فيها احتياجات المدرس من كشكول تحضير، طباشير، وأقلام سبورة وينزلوا المدرسة بيمارسوا يوم دراسي وكأنهم بالفعل مدرسين وبيحضروا دروس ويدخلوا حصص يشرحوا ويمضوا حضور وانصراف من المدرسة تحت إشراف موجهين وآخر السنة ليهم درجات على التدريب.
غرض التدريب أنه يعّد طالب كلية التربية أنه يكون مدرس ويزيل من عنده رهبة الوقوف قدام الطلاب.
وطلاب التربية العملي أجمعوا إن يوم التدريب من أفضل وأنشط أيام الأسبوع لأنه بيتيح ليهم القيام بالوظيفة والتدريب على مهنتهم المستقبلية.
ها فهمتوا مين دول اللي كانوا بيزورونا في الفصل كل أسبوع؟