أجمل ﺳﻨﻴﻦ ﺍﻟﻌﻤﺮ ولا إيه!

ﺩﻩ أنا بطولي؛ ﻫﻌﻴﺶ ﺳﻌﻴﺪة آزاي ﻭأعيشها ﺑﺎﻟﻄﻮﻝ ﻭﺍﻟﻌﺮﺽ ﻭأﻧﺎ ﻟﻮﺣﺪي!



ﻣﻦ ﻗﺒﻞ ﻣﺎ أدﺧﻞ ﺍﻟﺠﺎمعة ﺳﻤﻌﺖ ﻛﺘﻴﺮ ﻧﺎﺱ ﺑﺘﻘﻮلِّي إﻥ ﺩي أسعد أﻳﺎﻡ ﺣﻴﺎتي، ﻻﺯﻡ أﻋﻴﺸﻬﺎ ﺑﺎﻟﻄﻮﻝ ﻭﺍﻟﻌﺮﺽ ﻭإﻧﻬﺎ ﻣﺶ ﻫﺘﺘﻜﺮﺭ، ﻛﻨﺖ ﺑﺴﻤﻊ ﺍﻟﻜﻼﻡ ﺩﻩ ﻭأنا تايهة، ﻣﺶ ﻣﺮﻛﺰة ﻭﺟﻮﺍﻳﺎ أﺳﺌﻠﺔ ﻛﺘﻴﺮ، أﺳﻌﺪ أﻳﺎمي اﺯﺍي ﻭأﻧﺎ ﻟﻮﺣﺪي ﻭﺻﺤﺎبي في ﻛﻠﻴﺎﺕ ﺗﺎنية ﻭﺟﺎﻣﻌﺎﺕ ﺗﺎنية؟!
ﺩﻩ أنا بطولي؛ ﻫﻌﻴﺶ ﺳﻌﻴﺪة آزاي ﻭأعيشها ﺑﺎﻟﻄﻮﻝ ﻭﺍﻟﻌﺮﺽ ﻭأﻧﺎ ﻟﻮﺣﺪي!

ﻓﻀﻠﺖ ﺗﺎيهة ﻭﺯﺍﺩ ﺍﻟﺘﻮﻫﺎﻥ أكتر لحد أﻭﻝ ﻳﻮﻡ ﺟﺎمعة ﺑﻌﺪ ﻣﺎ ﻟﺒﺴﺖ أﺷﻴﻚ ﻃﻘﻢ ﻣﻦ ﺍﻟﻬﺪﻭﻡ ﺍللي ﺍﺷﺘﺮيتها، ﻭﻋﻠﻰ ﺑﺎﺏ ﺍﻟﺠﺎمعة ﺣﺴﻴﺖ إني طفلة -ﺭﺟﻞ ﻮﺭﺍ ﻭﺭﺟﻞ قدﺍﻡ- ﺣﺎﻭﻟﺖ آﺧﺪ ﻭﺿﻊ ﺍلثقة ﻭﻟﻜﻦ ﺗﺤﻔﻴﻞ ﺍﻟﺪﻓﻌﺎﺕ ﺍلأكبر ﺧﻼﻧﻰ أﺗﻬﺰ أكتر.

ﻋﺪﺕ الأﻳﺎﻡ ﻭﺑﻘﻰ ﻋﻨﺪي شلة ﺻﺤﺎﺏ ﻓﻴﻬﻢ ﺍﻟﻤﺠﺎﻧﻴﻦ، ﺍﻟﻌﺎﻗﻠﻴﻦ ﻭﺍﻟﻤﺜﻘﻔﻴﻦ، ﻛﻨﺖ أوﻝ ﻣﺮة أﺣﺲ -فعلًا- إني ﻣﺼﺎحبة ﻧﺎﺱ ﻣﺨﺘﻠﻔﻴﻦ عني ﺑﻴﺄﺛﺮوا ﻓﻴﺎ ﻭﺑﺄﺛَّﺮ فيهم، ﺷﻮية ﺷﻮية شخصيتي ﺑﺘﺘﻐﻴﺮ ﻭﺗﻔﻜﻴﺮي ﺑﻴﺘﻐﻴﺮ، ﺑﻘﻴﺖ ﻣﺒﺴﻮطة ﻣﻌﺎﻫﻢ ﻭﺣﺎسة إﻧﻬﻢ عشرة سنين. ﺩﺧﻠﺖ ﺍﻟﺠﺎمعة ﻭأنا ﻓﺎﻛﺮة كلمة ﻣﺎﻣﺎ وﺑﺎﺑﺎ ﻭﺍﻟﺠﻴﺮﺍﻥ “اﺗﻌﺐ في اﻟﺜﺎﻧﻮي ﻋﺸﺎﻥ ﺗﺮﺗﺎﺡ في ﺍﻟكلية” ﻭﻫﻴﺄﺕ نفسي إني ﻫﺮﺗﺎﺡ ﻭﺳﻤﻌﺖ عن الامتياز ﻓﻀﺤﻜﺖ ضحكة ﻣﻦ ﻓﺸﺨﺮة ﻭثقة في ﺍﻟﻨﻔﺲ؛ ﻭﻗﻠﺖ ﺩﻩ أنا جايبة ﺑﺼﺎﺑﻊ ﺭﺟﻠﻰ ﺍﻟﺼﻐﻴﺮ (٨٥%) -ﻫﻮﺏ ﺩﺍﺑﻞ ﻛﻴﻚ- لاقيتني في ﻣﻴﺪ ﻭﺭﺍ ﻣﻴﺪ ﻭﺭﺍ ﻣﻴﺪ، ﺷﻴﺘﺎﺕ، ﻣﻌﺎﻣﻞ، ﺳﻜﺎﺷﻦ ﻭﺍﻣﺘﺤﺎﻧﺎﺕ عملي ﻭﻓﺎﻳﻨﺎﻝ، ﺣﺴﻴﺖ إني ﺩﺧﻠﺖ ﻣﻔﺮمة ﻭﻋﺮﻓﺖ إن ﺟﻤلة “اﺗﻌﺐ ﻫﺘﺮﺗﺎﺡ” ﻃﻠﻌﺖ ﻓﻜﺴﺎنة.

ﻳﻤﻜﻦ ﻣﺶ ﻫﺘﺮﺗﺎﺡ ﻣﻦ ﺍﻟﻤذاكرة ﻭﺍﻻﻣﺘﺤﺎﻧﺎﺕ، ﺑﺲ ﻫﺘﺤﺲ ﺑﺮﺍحة ﻣﻊ ﺻﺤﺎﺏ ﺟﺪﻋﺎﻥ ﻫﻴﺒﻘﻮا ﺍﻟﺴﻨﺪ ﻭﺍلأﻣﺎﻥ ﻭﻛﻞ ﺣﺎجة ﺣﻠﻮة، ﻫﺘﺼﺤﻰ ﺍﻟﺼﺒﺢ ﻣﻦ ﺍﻟﻨﻮﻡ ﺑﺪﺭي ﺗﻠﺒﺲ ﻋﺸﺎﻥ ﺗﺮﻭﺡ ﺍلكلية ﺗﺸﻮﻓﻬﻢ؛ ﻓﻬﺘﻼﻗﻴﻬﻢ ﺣﺎﺟﺰﻳﻨﻠﻚ ﺟنبهم في آﺧﺮ “ﺑِﻨچ”؛ ﻫﺘﺤﺐ ﺣﺎﺟﺎﺕ ﻋﻤﺮﻙ ﻣﺎ ﺣﺒﻴﺘﻬﺎ ﻗﺒﻞ ﻣﺎ ﺗﺪﺧﻞ ﺍﻟﺠﺎﻣعة ﺑﺴﺒﺒﻬﻢ، ﻏﺎﻟﺒًا ﻭﺯﻧﻚ ﻫﻴﺰﻳﺪ لأن أي قعدة صحاب ﻓﻴﻬﺎ أكل، ﻫﻴﻌﺮﻓﻮا ﻋﻨﻚ ﻛﻞ ﺣﺎجة، ﻫﻴﻄﻤﻨﻮﻙ ﻗﺒﻞ ﺍﻻﻣﺘﺤﺎﻥ؛ لأنهم ﺑﺒﺴﺎطة ﻣﺬﺍﻛﺮﻭﺵ ﺯﻳﻚ، وﻫﻴﻌﻠﻤﻮﻙ ﺍﻟﺸﻘﺎﻭة ﻟﻮ أنت ﺑﻄﺒﻌﻚ ﻫﺎﺩي، وﻫﻴﺒﺴﻄﻮﻙ ﻟﻮ أنت ﻧﺎﺯﻝ ﻣﻦ ﺍﻟﺒﻴﺖ ﻣﻜﺘﺌﺐ. ﺳﻨﻴﻦ ﺍﻟﺠﺎمعة أجمل أﻳﺎﻡ ﺍﻟﻌﻤﺮ ﻭأﺳﺮﻋﻬﺎ، ﻫﺘﻌﺪي ﻋﻠﻴﻚ في غمضة ﻋﻴﻦ؛ ﺍﻭﻋﻰ ﺗﻌﻴﺸﻬﺎ ﻭﺣﻴﺪ ﻣﻦ ﻏﻴﺮ ﺻﺤﺎﺏ ﺑﺲ ﺍﺧﺘﺎﺭﻫﻢ ﺻﺢ ﻋﺸﺎﻥ أﻛﺒﺮ شلة هي ﺷﻠﺔ ﺻﺤﺎﺏ ﺍﻟﺠﺎمعة، ﺍﻭﻋﻰ ﺗﻌﻴﺶ ﺍﻟﺴﻨﻴﻦ ﺩﻯ ﺑﻴﻦ ﺍﻟﻜﺘﺐ ﻭﺍﻟﻤﺤﺎﺿﺮﺍﺕ ﺑﺲ، تطوع في نشاط طلابي، اﺷﺘﻐﻞ، ﺟﺮﺏ، ﺣﺎﻭﻝ، اﻓﺸﻞ، انجح، اﻗﺮأ، خد ﻛﻮﺭﺳﺎﺕ، ﺣﺎﻭﻝ ﺗﺒﺪﺃ في الـ CV، وﻗﺪﻡ في ﺍﻧﺘﺮﻓﻴﻮﻫﺎﺕ ﻭﺍﺗﺮﻓض ﻭﻣﺎﻟﻪ ﺣﺎﻭﻝ ﺗﺎني.

ﺍلسنة دي أوﻝ سنة ﺟﺎمعة ﻟﻴﻚ ﻫﺘﻐﻤﺾ ﻭتفتح ﻫﺘﻼﻗﻴﻚ ﺑﺘﺘﺨﺮﺝ ﻭﺑﺘﺎﺧﺪ “ﺍﻟﺸﻬﺎﺩة ﺍﻟﻜﺒﻴﺮة” ﺍللي ﻗﺎﻟﻮﻟﻚ ﻋﻠﻴﻬﺎ ﻓﺤﺎﻭﻝ ﻣﺘﺎﺧﺪﺵ ﻣﻦ ﺍﻟﺠﺎمعة ﺷﻬﺎﺩة ﺑﺲ، ﺧﺪ ﻣﻨﻬﺎ ﺻﺤﺎﺏ، ﺗﺠﺎﺭﺏ، ﻣﻮﺍﻗﻒ وذكريات ﺗﻌﻴﺶ ﺟﻮﺍﻙ ﺳﻨﻴﻦ ﻗﺒﻞ ﻣﺎ ﺗﻼقي ﻧﻔﺴﻚ ﻭﺻﻠﺖ سنة ﺍﻟﺘﺨﺮﺝ ﺍﻟلي بيقولوا ﻋﻠﻴﻬﺎ سنة ﺍﻟﺒﺎي باي.