حوار مع المدوّنة الإلكترونية (مي السيد).

أنا عايزة الشباب العلمي العربي يبقى في المعامل والمراجع، إنما "سوشيال ميديا"، والمنظرة دي للأسف الطريقة كلها غلط.

حوار مع المدوّنة الإلكترونية (مي السيد).

“أنا (مي السيد) خريجة علوم المنصورة قسم جيوفيزيا لسنة (2013)- مدوّنة بكتب في كذا موقع أونلاين أشهرهم (أراجيك، إضاءات، كلافو…)، كل منصة من دول ليها شكل معين في الكتابة، يعني مثلًا (أراجيك): مقالات عادية وعلوم، (إضاءات): مقالات متخصصة في قسم العلوم وتقنية، (كلافو): شغلي فيها “ريبورتات” بمعنى أني بجيب شخصية ناجحة عملت مشروع، عملت مبادرة أو نشاط طلابي جيد، أو عملت محتوى كويس وبعمل معاهم إنترفيو، بعرف القصة وراهم وسر الحاجة اللي عملوها دي…اشتغلت فترة في (الباحثون المصريون) كقائدة فريق، أما حاليًا شغالة (Social media manger) في (Bring up genius) و “مهرجان سايكوب للعلوم”.

 

-(الباحثون، أراجيك، إضاءات…) إيه كان دافعك وملهمك إنك تبدأي على المنصات دي وتكملي؟

-في (أراجيك) كانت البداية لأني كنت وقفت عن الماجسيتر بعد ماسجلت فيه؛ فحصلي زي انتكاسة وتعبت نفسيًا فوق الـ(3 شهور) فحاولت أخرج نفسي من القصة دي كلها؛ فكانت بدايتي في (أراجيك) وبعد كدا ابتديت في مشاريع زي (Bring up genius) واللي كان هدفها إنها كانت بتعمل ورش تعليمية، وجزء صغير تبسيط للعلوم بس مش متخصصة فيه، كانت خليط بين علوم، تعليم وتنمية مهارات…بعد كدا دخلنا على (أسبوع العلوم المصري)، وبعدين (سيتوبيا) وهي بتتيح لأي حد يكتب محتوى علمي على الأنترنت، (سايكوب) بقي دا كان آخر حاجة، عبارة عن مهرجان ترفيهي علمي للأطفال، والحمدلله نجح واتكرم من (وزير الصناعة والتجارة) وأخد المركز التاني في مبادرة (innovety) وحضره حوالي (1000-1500) طفل خلال (3) أيام.

-طب مع كل دا، كنتي بتنظمي وقتك إزاي، “التوفيق بين الدراسة وأي حاجة عايز اعملها في حياتي”؟

-أنا خريجة، بس أنت كطالب لازم تتعلم تنظيم الوقت -حتى لو أنت مش بتعمل أي نشاطات-، أنت لو مش بتنظم وقتك ومش بتعمل حاجة في حياتك؛ هتقضي وقتك على الـ(Facebook)، بس لو أنت عندك (10 مهمات) في اليوم وعرفت تنظمهم صح؛ هتعرف تمشي فيهم كلهم…بس مثلًا في (سايكوب) حصلّي ضغط الـ(3 أيام) قبل انطلاق المهرجان، فبتنضغط بس في أوقات محددة…إنما حكاية التوفيق: لو أنت قاعد فاضي هتلاقي نفسك بتضيع وقت كتير، بس كل الفكرة إني لما بقعد ساعتين هشتغل مثلًا مقالة على (أراجيك) يبقى تخلص في الساعتين.

-لاحظنا أن التدوين الإلكتروني انتشر جدًا خلال الفترة الأخيرة عن التدوين الورقي -خصوصًا مع استخدامنا للـ”smart phone”-، في رأيك إيه الأفضل وإيه الأقرب ليكِ؟

-من رأيي الشخصي إن التدوين الإلكتروني الأقرب ليا، مع إني في الجهة التانية مابحبش القراءة الإلكترونية…بس موضوع التدوين الإلكتروني بيتميز إنه بيوصل لأعلى عدد من الناس، يعني في ناس ماتقدرش تقرأ الجرايد، فكرة الجرايد نفسها اندثرت؛ فالتدوين الإلكتروني بيوصل لكل الناس، لكافة الشرائح وعلى كذا منصة، عندك سوشيال ميديا، المواقع والمدونات وشايفه المستقبل للإلكتروني؛ وعشان كدا بشجع ثقافة السوشيال ميديا والتدوين الإلكتروني تبقى أفضل من كدا كمان من حيث جودة المحتوى أو التسويق ليها…فاحنا بعد عشر سنين مش هنلاقي ناس بتستخدم الورق، لكن الكتب دي الشيء الأساسي فدي قصة تانية بعيدة عن التدوين، متقدرش تبدأ تدوين غير لما تقرأ كتب كتير وتكوّن أسلوبك وبعدين تبدأ تدوّن.

-الفترة الأخيرة ترددت على الإنترنت جملة (إثراء المحتوى العلمي والمعرفي العربي على الإنترنت)، كلمينا عن الجملة دي أكثر؟

-من وجهة نظري إثراء المحتوى العلمي هو كان القصد منه إنك تعمل محتوى علمي يوصل للناس بطريقة كويسة، ومن غير مايبقى معقد، محتوي علمي متاح لكل الناس..ومش بس الحاجات العلمية البحتة بس إنما في كل المجلات…لكن كلمة “المحتوي العملي العربي” ارتبطت بصفحات الباحثون علي اختلاف جنسياتهم بقي، دول بيحصروهم في كلمة المحتوى العلمي العربي.

– بما إننا اتكلمنا عن العلم على النت فأكيد هنجيب سيرة ال(Popular science)، فهل دا هيجلب نفع ولا هيفضل العلم في المراجع والكتب؟

– بالنسبة للـ(Popular Science) دا مهمته إنه يوصل معلومة، بس كونك إنك تعتمده كعلم دا الغلط، وأكتر الناس بتقع في الغلط دا: إن يكون كل مصدر معرفتهم العلمية البحتة -لو شغال في بحث مثلاً- هو فيديو لحد بيتكلم (10 دقايق) عن جزئية علمية، فالـ(Popular science) ماهو إلا وسيلة مساعدة لتبسيط العلوم كمعرفة، إنما مايعتمدش أبدًا كبديل عن المراجع، ومش حاجة أساسية تغني عن المراجع والكتب.

– شايفه المجتمع الشبابي العلمي المصري والعربي فين الفترة الجاية؟

– مفيش مقياس للنجاح، هو أهم حاجة إنك تضمن الاستمرارية: لو هناخد (سايكوب) مثال فهو “مهرجان بيتعمل سنوياً للأطفال”، أنت لو حافظت إنه كل سنة يتعمل في مكان؛ أنت كدا حافظت على (سايكوب)، أنت كدا يعتبر نجحت في إنك تحقق هدف المشروع دا…

لازم الشباب يهتم بالعلوم مش بس في نطاق “السوشيال ميديا”، ولا إنك تفضل تكتب بوستات، أنا شخصيًا بتضايق إني ألآقي خريجين علوم بيحسوا إنهم علماء على “السوشيال ميديا”، أنت مكانك مش هنا، أنت عندك معلومة وعايز تعمل فيها بحث ماتنشرش على “السوشيال ميديا”؛ لأنه هيعتبر كـ(Popular science) يعتبر كبوست مهمل، يعتبر مليان أخطاء علمية؛ فأنا عايزة الشباب العلمي العربي يبقى في المعامل والمراجع، إنما “سوشيال ميديا”، والمنظرة دي للأسف الطريقة كلها غلط.