شباب مسلسلات رمضان 2016 بيعملوا حاجات غريبة!

ماراثون المسلسلات في رمضان فرصة لكتير من النجوم الشباب انهم يثبتوا نفسهم. احنا اخترنا 4 من الشباب إللي لفتوا نظرنا لحد دلوقتي:



هنا الزاهد … “مأمون وشركاه”

 

كانت بدايتها في فيلم “خطة جيمي” في 2014 ٬ وبعدها شاركت هنا الزاهد الفنان تامر حسني في مسلسل فرق توقيت في رمضان 2014، وفي أكتر من مسلسل رمضان اللي فات.

السنة دي هنا (نيفين) بتؤدي دور بنت مصطفى فهمي في مسلسل الزعيم عادل إمام … الدور مشوق من بداية المسلسل لما قررت نيفين تتحدى أهلها وتتجوز شاب مسيحي وتهاجر لأمريكا.

الجوازة ما مشيتش، لكن بعدها جابتلهم واحد (بعد ما اتأكدت إنه مش مسيحي) طلع أبوه بيركّن الميكروباصات في المنيب.

ودلوقتي بتلف على خالد سليم، اللي متجوز وعنده ولد.. (ينفع كده؟)

أحمد داش…”سقوط حر”

 

يمكن نعرفه أكتر بـ”هاني بيتر” … بعد دور اتكلمت عنه مصر كلها في “لا مؤاخذة” في 2014. السنة دي داش طالع إبن نيللي كريم (ملك) في مسلسل سقوط حر.

دور آدم يعتبر تحدي جديد للممثل الشاب … فجأة اتواجه بوفاة والده وإن أمه محجوزة في العباسية واضطر ينتقل لبيت جدته وبعدين عمته! و لسه لما آدم يكتشف إن سبب تعب أمه إنها متهمة بقتل والده و خالته، هيكون التحدي أكبر .. دور آدم فرصة كبيرة لداش السنة دي.

 

أسماء فوزي … “سقوط حر” 

 

لفتت النظر من أول حلقة ظهرت فيها، بنظراتها المعبرة وتقمصها للدور اللي اضطرها تحلق شعرها تماماً!

دور جميلة في “سقوط حر” ممكن يكون الإنطلاقة الحقيقية لأسماء فوزي إللي بدأت التمثيل في المسرح من 2003، و شاركت في أعمال درامية زي “أن عشقت” و “سرايا عابدين”. الدور مش كبير بس بردو مش سهل … وأسماء عرفت تثبت قوة أدائها ولو في مشاهد قليلة!

شريف فايد .. “ليالي الحلمية”

 

تقريباً كل بنات مصر قرروا يشوفوا الجزء السادس من ليالي الحلمية عشان خاطر سولي (شريف فايد) مع إن محدش فاهم الحكاية أصلاً ولا حد مجمع مين ابن مين!

شريف فايد من نجوم “vine” و-“فيسبوك” و-“إنستجرام” … ده غير إنه موديل وكان لاعب كورة! السؤال بقى زي ما هو اشهر viner في مصر، يا ترى هيلمع أكتر في التليفزيون ولا..؟