8 حاجات بتلخص كل اللي قاله حمدين صباحي مع الإبراشي

ملخص اللي قاله عن النزول في ٢٥ يناير والجيش وأحمد موسى والبرادعي وإيران



أجمد فورمتين شعر (على رأي باسم يوسف) اتجمعوا عشية عيد الميلاد في لقاء مدته 3 ساعات بعد اختفاء صباحي سنة ونص من بعد فوز السيسي بالرئاسة وحصول صباحي على نسبة أقل من عدد الأصوات الباطلة.

الإبراشي لم يقاطعه إلا نادراً، وصباحي تناول مواضيع بجرأة وانفعال وانسيابية في كلامه كعادته تخليك عاوز تسمعه حتى لو اختلفت معاه. واتكلم تقريباً في  كل شيء لدرجة أن البعض انتقده متسائلاً: بأي صفة يتحدث باسم الشعب؟

دي أهم الحاجات اللي اتقالت:

 ١. تدخل الجيش استثناء

Sabahy-Maysa7esh-Keda

يعني لو في حاجه ينفع يتقال عليها ميصحش كده، هي دي. أرجو إننا نخلي جيشنا فوق الاتفاق والخلاف. أنا ممكن أتفق و اختلف مع رئيس الجمهورية، ..لكن الجيش لأ.” فقال له الإبراشي: “لولاه لما نجحت المشاريع الكبرى التي أنجزت”، فرد صباحي: “ده الاستثناء بس إذا تحول الاستثناء لقاعدة، فمعناه إنك تضحي بالقاعدة. القاعدة أن مؤسسات الدولة يجب أن تدار بكفاءة كلها ودي مسئولية رئيس الجمهورية”

٢. أحمد موسى صوت سيده

Sabahy-Mokhber-Mozee3

“دي الواقعة الوحيدة اللي اتذاعت (تسريبات خالد يوسف)، لكن في وقائع كتير تم التهديد بها.. كل صاحب رأي يطلعله حد يفترض إنه إعلامي لكن هو الحقيقة مخبر (يقصد أحمد موسى)، الجهاز اللي مشغله حطه مذيع عشان ينتهك أعراض الناس وقيم أخلاقية ووطنيه ويسفه السلطة.. في ناس بيقابلونا كتير في الإعلام الآن إحنا عارفين إن ملهمش رأي، كل دول ينطبق عليهم مقولة his master’s voice  صوت سيده..”

٣. قطع النور

Sabahy-Nor-2ata3

بعد أقل من ٢٠ دقيقة، انقطع النور ودخلت القناة في فاصل إعلاني 25 دقيقة، وانطلقت بعدها مواقع التواصل الاجتماعي في اتجاهين: وشّه نحس، أو الإرسال تم قطعه عمداً. لغاية ما طلع الإبراشي واعتذر وقال “اشتغلنا على الخط التاني”. ومن ساعتها و#حمدين_صباحي تريند. يعني الموضوع جه في صالحه!

٤. رفض النزول في ٢٥ يناير

Sabahy-Meen-El-Badeel

رفض صباحي النزول يوم ٢٥ يناير القادم، قائلاً: “ليس هذا أصلح ولا أفضل وقت للنزول لسببين: لا الشعب مهيأ ولا مرحب، والسلطة مش متفهمة ولا عاقلة بما فيه الكفاية لتحمي أبناءها بدل ما تعتدي عليهم.” وأضاف: “في شباب من اللي بيكتبوا على الفيسبوك بيقولوا تعالى ننزل نطلب إسقاط النظام، طب وافرض عملت كده هو مين البديل اللي عندك؟ أنا بقول لهم إنت معندكش بديل”

٥. عن البرادعي: “مفيش نضال بالشوكة والسكينة”

Mafish-Nedal-Bel-Shoka-Wel-Sekkina

عن البرادعي: “اللي بيخوض نضال سياسي عشان هدف عظيم عليه أن يتحمل.. لأن عنده هدف أنبل. مفيش نضال بالشوكة والسكينة. أنا أحترم ضمير هذا الرجل ودوره، وأخطّئه في انسحابه.. فهو خلى بناس كتير كانت متعشّمه..” وأشار في موضع لاحق أنه لا يوافق أن يعارض أحد “مجاناً” من خارج مصر دون أن يتحمل تبعات معارضته، بالرغم من احترامه لهم.

٦. للرئيس السيسي: “اسمع كلامك أصدقك،  أشوف قرار التعيينات أستعجب”

Sabahy-Om-El-Kwaneen

انتقد صباحي بانفعال شديد تعيين الرئيس لبعض الناس في مجلس الشعب تهاجم ثورة ٢٥ يناير، وتساءل: “(هل) كان ينفع يضع رئيس الجمهورية في هؤلاء واحد بيقول على ٣٠ يونيو إنقلاب؟

٧. “أميّز بين المصريين على أساس من احترم القانون ومن خالفه”

Sabahy-Sogna2-El-Ra2yi

دافع صباحي عن حق المواطنة للإخوان أو أي فصيل، مضيفاً: “اللي كان.. ماسك بندقية أو بيحط لغم لابد أن يعامل بحسم.. يتحاكم ويحكم عليه“، رافضاً  مطاردة المسالمين منهم. وطالب بالإفراج عن كل سجناء الرأي بغض النظر عن انتمائهم، قائلاً: “أحد معايير الدولة القوية إنها تثق في نفسها.. وتفرج عن كل صاحب رأي، دي مش قوة، ده إرهاب تمارسه الدولة. إرهاب الدولة ده هو الاستبداد والخروج عن القانون.” وفي موضع آخر قال: “عضلات الأجهزة الأمنية تنمو والعقل السياسى يشهد ضموراً.”

٨. عن إيران: “أنا مبفرقش في الإسلام بين شيعي وسنّي”

Sabahy-Bakrah-Israel

“العداء الحقيقي الدائم في هذه المنطقة هو العداء مع إسرائيل.. مع إيران وتركيا، ده تنافس.” مضيفاً أنه ليس من مصلحة الوطن العربي “جرّ السعودية وإيران إلى حرب.. دي حرب كلنا فيها خاسرين. وكل اللي هيخسروا فيها مسلمين لأن أنا مبفرقش في الإسلام بين شيعي وسنّي.. إسرائيل محتلة مقدسات مسلمين ومسيحيين، كنيسة القيامة والمسجد الأقصى..” مضيفاً أنه يساند انتفاضة “السكين في مواجهة ترسانة سلاح العدو الصهيوني.”